Ìwé Nọ́ḿbà 24:1-25 BYB2014 - Bible AI

¹Nísinsìnyìí nígbà tí Bálámù rí i wí pé ó tẹ́ Ọlọ́run lọ́rùn láti bùkún àwọn Ísírẹ́lì, kò lo ọ̀nà ìṣoṣó gẹ́gẹ́ bí ó ti ṣe tẹ́lẹ̀, ṣùgbọ́n ó yí ojú rẹ̀ sí apá ihà.

²Nígbà tí Bálámù wo ìta ó sì rí Ísírẹ́lì tí wọ́n pàgọ́ gẹ́gẹ́ bí ẹ̀yà wọn, Ẹ̀mí Ọlọ́run sì bà sórí rẹ̀

³ó sì bẹ̀rẹ̀ òwe rẹ̀:

³“Ó wí pé Bálámù ọmọ Béórì, òwe ẹni tí ojú rẹ̀ mọ́lẹ̀,

⁴Òwe ẹni tí ó gbọ́ ọ̀rọ̀ Ọlọ́run, ẹni tí ó ríran láti ọ̀dọ̀ Olódùmarè, ẹni tí ó dojúbolẹ̀, tí ojú rẹ̀ sì là:

⁴

⁵“Àgọ́ rẹ ti dára tó, ìwọ Jákọ́bù, àti ibùgbé rẹ, ìwọ Ísírẹ́lì!

⁵

⁶“Gẹ́gẹ́ bí àfonífojì tí ó tàn jáde, gẹ́gẹ́ bí ọgbà tí ó wà ní ẹ̀bá odò ńlá, gẹ́gẹ́ bí igi aloe tí OLÚWA gbìn, gẹ́gẹ́ bí igi òpépé tí ó wà lẹ́bá odò.

⁷Omi yóò sàn láti inú garawa: èso wọn yóò ní ọ̀pọ̀lọpọ̀ omi.

⁷“Ọba wọn yóò ga ju Ágágì lọ; ìjọba wọn yóò di gbígbéga.

⁸“Ọlọ́run mú wọn jáde láti Éjíbítì wá; wọ́n ní agbára gẹ́gẹ́ bí i ti kẹ́tẹ́kẹ́tẹ́. Wọ́n jẹ orílẹ̀ èdè run, wọ́n fọ́ egungun wọn sí wẹ́wẹ́; wọ́n fi idà wọn gún wọn.

⁹ⓐ Ó tẹríba ó sì dùbúlẹ̀ bí kìnnìún, bí abo kìnnìún: ta ni ó gbọdọ̀ jí wọn?

⁹“Ìbùkún ni fún ẹni tí ó bùkún fún ọ, kí ìfibú jẹ́ ti ẹni tí ó fi ọ́ bú!”

¹⁰Nígbà náà ni ìbínú Bálákì sì dé sí Bálámù. Ó sì fi ọwọ́ lu ọwọ́ ó wí pé, “Mo pè ọ́ láti bú àwọn ọ̀ta mi ṣùgbọ́n o tún bùkún fún wọn nígbà mẹ́ta yìí.

¹¹Nísinsìnyìí kúrò lọ́dọ̀ mi kíákíá kí o sì máa relé! Mo sọ wí pé màá sọ ọ́ di ẹni ńlá, ṣùgbọ́n OLÚWA kò jẹ́ kí o gba èrè yìí.”

¹²Bálámù dá Bálákì lóhùn, “Ǹjẹ́ èmi kò sọ fún àwọn ìránṣẹ́ tí o rán sí mi wí pé,

¹³‘Kó dà bí Bálákì bá fún mi ní ààfin rẹ̀ tí ó kún fún fàdákà àti wúrà, n kò le ṣe ohunkóhun lọ́wọ́ ara mi, yálà búburú tàbí rere, láti kọjá òfin OLÚWA: ohun tí OLÚWA bá wí ni èmi ó sọ’?

¹⁴Nísinsin yìí mò ń padà lọ sí ọ̀dọ̀ àwọn ènìyàn mi, ṣùgbọ́n jẹ́ kí èmi kí ó kìlọ̀ fún ọ nítorí nǹkan tí àwọn ènìyàn wọ̀nyí yóò ṣe sí àwọn ènìyàn rẹ ní ọjọ́ iwájú.”

¹⁵Nígbà náà ni ó bẹ̀rẹ̀ òwe: “Òwe Bálámù ọmọ Béórì, òwe ẹnì tí ojú rẹ̀ ríran kedere,

¹⁶òwe ẹni kan tí etí rẹ̀ ń gbọ́ ọ̀rọ̀ Ọlọ́run, tí ó ní ọgbọ́n láti ọ̀dọ̀ Ẹni gíga jùlọ, tí ó ríran láti ọ̀dọ̀ Olódùmarè, ẹni tí ó dọ̀bálẹ̀, tí ojú rẹ̀ sì sí:

¹⁶

¹⁷“Mo rí i, ṣùgbọ́n kì í ṣe ìsinsin yìí, Mo kíyèsi, ṣùgbọ́n kò súnmọ́. Ìràwọ̀ kan yóò jáde láti ọ̀dọ̀ Jákọ́bù; yóò yọ jáde láti Ísírẹ́lì. Yóò tẹ̀ fọ́ orí Móábù, yóò sì fọ́ agbárí gbogbo ọmọ Ṣéétì.

¹⁸Wọn yóò borí Édómù; yóò ṣẹ́gun Ṣéérì ọ̀ta rẹ̀, ṣùgbọ́n Ísírẹ́lì yóò dàgbà nínú agbára.

¹⁹Olórí yóò jáde láti Jákọ́bù yóò sì pa àwọn tó ṣẹ́kù nínú ìlú náà run.”

²⁰Nígbà náà ni Bálámù rí Ámálékì ó sì bẹ̀rẹ̀ òwe: “Ámálékì ni àkọ́kọ́ nínú àwọn orílẹ̀ èdè, ṣùgbọ́n yóò dahoro níkẹyìn.”

²¹Nígbà náà ní ó rí ará Kénitì ó sì bẹ̀rẹ̀ òwe: “Ibùgbé rẹ ní ààbò, ìtẹ́ rẹ ni a tò sínú àpáta;

²²ṣíbẹ̀ ẹ̀yin ará Kenítì ni yóò di píparun nígbà tí Áṣúrì bá mú yín ní ìgbékùn.”

²³Nígbà náà ni ó bẹ̀rẹ̀ òwe rẹ̀: “Áì, ta ni ó lè yè nigbà tí Ọlọ́run bá ṣe èyí?

²⁴Ọkọ̀ yóò wá láti ibùdó kọ̀ Kítímù; wọn yóò ṣẹ́gun Áṣù àti Ébérì, ṣùgbọ́n àwọn náà yóò di píparun.”

²⁵Nígbà náà ni Bálámù dìde ó sì padà sí ilé rẹ̀, Bálákì sì lọ ní ọ̀nà tirẹ̀.