Ìwé Oníwàásù 3:1-22 BYB2014 - Bible AI

¹Àsìkò wà fún ohun gbogbo àti ìgbà fún gbogbo nǹkan ní abẹ́ ọ̀run.

²Ìgbà láti bí àti ìgbà kíkú, ìgbà láti gbìn àti ìgbà láti fàtu.

³Ìgbà láti pa àti ìgbà láti mú lára dá ìgbà láti wó lulẹ̀ àti ìgbà láti kọ́.

⁴Ìgbà láti ṣunkún àti ìgbà láti rín ẹ̀rín ìgbà láti sọ̀fọ̀ àti ìgbà láti jó

⁵Ìgbà láti tú òkúta ká àti ìgbà láti ṣà wọ́n jọ ìgbà láti ṣún mọ́ àti ìgbà láti fà ṣẹ́yìn

⁶Ìgbà láti wá kiri àti ìgbà láti ṣàì wá kiri ìgbà láti pamọ́ àti ìgbà láti jù nù,

⁷Ìgbà láti ya àti ìgbà láti rán ìgbà láti dákẹ́ àti ìgbà láti ṣọ̀rọ̀

⁸Ìgbà láti níìfẹ́ àti ìgbà láti kóríra ìgbà fún ogun àti ìgbà fún àlàáfíà.

⁹Kí ni òṣìṣẹ́ jẹ ní èrè nínú wàhálà rẹ̀?

¹⁰Mo ti rí àjàgà tí Ọlọ́run gbé lé ọmọ ènìyàn.

¹¹Ó ti ṣe ohun gbogbo dáradára ní àsìkò tirẹ̀, ó sì ti fi èrò nípa ayérayé sí ọkàn ọmọ ènìyàn, ṣíbẹ̀, wọn kò le ṣe àwárí ìdí ohun tí Ọlọ́run ti ṣe láti ìbẹ̀rẹ̀ títí dé òpin.

¹²Mo mọ̀ wí pé kò sí ohun tí ó dára fún ènìyàn ju pé kí inú wọn dùn kí wọn sì ṣe rere níwọ̀n ìgbà tí wọ́n sì wà láàyè.

¹³Wí pé: kí olúkúlùkù le è jẹ, kí wọn sì mu, kí wọn sì rí ìtẹ́lọ́rùn nínú gbogbo iṣẹ́ wọn ẹ̀bùn Ọlọ́run ni èyí jẹ́.

¹⁴Mo mọ̀ wí pé ohun gbogbo tí Ọlọ́run ṣe ni yóò wà títí láé, kò sí ohun tí a lè fi kún un tàbí kí a yọ kúrò nínú rẹ̀. Ọlọ́run ṣe èyí kí ènìyàn le è ní ìbẹ̀rù rẹ̀ ni.

¹⁵Ohun tí ó wà ti wà tẹ́lẹ̀, ohun tí ó ń bọ̀ wá ti wà tẹ́lẹ̀, Ọlọ́run yóò sì mú kí àwọn ohun tí ó ti ṣẹlẹ̀ ṣẹ́yìn tún ṣẹlẹ̀

¹⁶Mo sì tún rí ohun mìíràn ní abẹ́ ọ̀run dípò ìdájọ́, òdodo ni ó wà ní bẹ̀ dípò ètò òtítọ́, ẹ̀ṣẹ̀ ní o wà ní bẹ̀.

¹⁷Mo rò nínú ọkàn mi, “Ọlọ́run yóò mú ṣẹ sí ìdájọ́ Olótìítọ́ pẹ̀lú ẹlẹ́ṣẹ̀, Nítorí pé àsìkò yóò wà fún gbogbo iṣẹ́, àti àsìkò fún gbogbo ìṣe.”

¹⁸Mo tún ro pe “Ọlọ́run ń dán wa wò láti fi hàn wá wí pé bí ẹranko ni ènìyàn rí.

¹⁹Ó ní láti jẹ́ ohun ìrántí pé ìpín ènìyàn rí bí i tẹranko ìpín ń dúró dè wọ́n. Bí ọ̀kan ti ń kú náà ni èkejì yóò kú. Àwọn méjèèjì ni irú èémí kan náà, ènìyàn kò ṣàn ju ẹranko lọ, nítorí pé aṣán ni yíyè jẹ́ fún wọn.

²⁰Ibì kan náà ni gbogbo wọn ń lọ, wọ́n wá láti inú erùpẹ̀, inú erùpẹ̀ náà ni wọn yóò tún padà sí.

²¹Ta ni ó mọ̀ bóyá ẹ̀mí ènìyàn ń lọ sí òkè tí ẹ̀mí ẹranko sì ń lọ sí ìsàlẹ̀ nínú ilẹ̀ ní?”

²²Nígbà náà, ni mo wá ríi wí pé, kò sí ohun tí ó sàn fún ènìyàn ju kí ó gbádùn iṣẹ́rẹ̀, nítorí pé ìpín tirẹ̀ ni èyí. Tàbí ta ni ó le è mú kí ó rí ohun tí yóò ṣẹlẹ̀ lẹ́yìn-in rẹ̀ kò sí!