Ìwé Sáàmù 119:1-176 BYB2014 - Bible AI

¹Ìbùkún ni fún àwọn ẹni tí ọ̀nà wọn wà láìlẹ́sẹ̀, ẹni tí í rìn ní ìbámu pẹ̀lú òfin OLÚWA,

²Ìbùkún ni fún àwọn ẹni tí ń pa òfin Rẹ̀ mọ́ tí wọn sì ń wá a pẹ̀lú gbogbo ọkàn wọn.

³Wọn kò ṣe ohun tí kò dára; wọ́n rìn ní ọ̀nà Rẹ̀.

⁴Ìwọ ti la ìlànà Rẹ̀ sílẹ̀ kí a sì pa wọ́n mọ́ gidigidi.

⁵Ọ̀nà mi ìbá dúró ṣinṣin láti máa pa òfin Rẹ̀ mọ́!

⁶Nígbà náà, ojú kò ní tì mí nígbà tí mo bá ń kíyèsí àṣẹ Rẹ̀ gbogbo.

⁷Èmi yóò yìn ọ́ pẹ̀lú ọkàn ìdúró ṣinṣin bí èmi bá ti kọ́ òfin òdodo Rẹ̀.

⁸Èmi yóò gbọ́ràn sí asẹ Rẹ̀: Má ṣe kọ̀ mí sílẹ̀ pátapáta.

⁸

⁹Báwo ni àwọn èwe ènìyàn yóò ti ṣe pa ọ̀nà Rẹ̀ mọ́? Láti máa gbé ní ìbámu sí ọ̀rọ̀ Rẹ.

¹⁰Èmi wá ọ pẹ̀lú gbogbo ọkàn mi má ṣe jẹ́ kí èmi yàpa kúrò nínú àṣẹ̀ Rẹ.

¹¹Èmi ti pa ọ̀rọ̀ Rẹ mọ́ ní ọkàn mi kí èmi má ba à ṣẹ̀ sí ọ

¹²Ìyìn ni fún OLÚWA; kọ́ mi ní àsẹ Rẹ.

¹³Pẹ̀lú ètè mi èmi tún sírò gbogbo òfin tí ó wá láti ẹnu Rẹ.

¹⁴Èmi yọ̀ nínú títẹ̀lé òrin Rẹ bí ènìyàn ṣe ń yọ̀ nínú ọlá ńlá.

¹⁵Èmi ń ṣe àṣàrò nínú ìlànà Rẹ èmi sì kíyèsí ọ̀nà Rẹ

¹⁶Inú mi dùn sí àṣẹ Rẹ; èmi kì yóò gbàgbé ọ̀nà Rẹ.

¹⁷Ṣe rere sí ìránṣẹ́ Rẹ, èmi yóò sì wà láàyè; èmi yóò ṣe ìgbọ́ràn sí ọ̀rọ̀ Rẹ.

¹⁸La ojú mi kí èmi lè ríran rí ohun ìyanu tí ó wà nínú òfin Rẹ.

¹⁹Àlejò ní èmi jẹ́ láyé; Má ṣe pa àṣẹ Rẹ mọ́ fún mi.

²⁰Ọkàn mi pòrúúru pẹ̀lú ìfojúsọ́nà nítorí òfin Rẹ nígbà gbogbo.

²¹Ìwọ fi àwọn agbéraga bú, àwọn tí a fi gégùn-ún tí ó sìnà kúrò nínú àṣẹ Rẹ.

²²Mú ẹ̀gàn àti àbùkù kúrò lára mi, nítorí èmi pa òfin Rẹ mọ́.

²³Bí ó tilẹ̀ jẹ́ pé àwọn alákòóso kójọ̀pọ̀, wọ́n ń sọ̀rọ̀ ìbàjẹ́ sí mi, ṣùgbọ́n ìránṣẹ́ Rẹ̀ ń ṣe àṣàrò nínú àṣẹ Rẹ.

²⁴Òfin Rẹ ni dídùn inú mi; àwọn ní olùbadámọ̀ràn mi.

²⁵Èmi tẹ̀ jẹ́ẹ́jẹ́ sínú erùpẹ̀; pa ayé mi mọ́ sí ipa ọ̀rọ̀ Rẹ.

²⁶Èmi tún ọ̀nà mi síròṣ ìwọ sì dá mí lóhùn; kọ́ mi ní àṣẹ Rẹ.

²⁷Jẹ́ kí ń mọ ẹ̀kọ́ ìlànà Rẹ̀: nígbà náà ni èmi yóò ṣe àṣàrò iṣẹ́ ìyanu Rẹ.

²⁸Ọkàn mi ń ṣe àárẹ̀ pẹ̀lú ìbànújẹ́; fi agbára fún mi gẹ́gẹ́ bí ọ̀rọ̀ Rẹ.

²⁹Pa mí mọ́ kúrò nínú ọ̀nà ẹ̀tàn fún mi ní oore ọ̀fẹ́ nípa òfin Rẹ.

³⁰Èmi ti yan ọ̀nà òtítọ́ èmi ti gbé ọkàn mi lé òfin Rẹ.

³¹Èmi yára di òfin Rẹ mú. OLÚWA má ṣe jẹ́ kí ojú kí ó tì mí.

³²Èmi sáré ní ipa ọ̀nà àṣẹ Rẹ, nítorí ìwọ, ti tú ọkàn mi sílẹ̀.

³³kọ́ mi, OLÚWA, láti tẹ̀lé àṣẹ Rẹ; nígbà náà ni èmi yóò pa wọ́n mọ́ dé òpin.

³⁴Fún mi ní òye, èmi yóò sì pa òfin Rẹ mọ́ èmi yóò sì máa kíyèsíi pẹ̀lú ọkàn mi.

³⁵Fi ipa ọ̀nà àṣẹ Rẹ hàn mí, nítorí nínú Rẹ̀ ni èmi rí inú dídùn.

³⁶Yí ọkàn mi padà sí òfin Rẹ̀ kí ó má ṣe sí ojú kòkòrò mọ́.

³⁷Yí ojú mi padà kúrò láti máa wo ohun asán: pa ayé mí mọ́ gẹ́gẹ́ bí ọ̀rọ̀ Rẹ.

³⁸Mú ìlérí Rẹ sẹ sí ìránṣẹ́ Rẹ, nítorí òfin Rẹ dára.

³⁹Yí ẹ̀gàn mi padà tí mo bẹ̀rù ni torí tí idájọ́ Rẹ dára.

⁴⁰Kíyèsíi ọkàn mi ti fà sí ẹ̀kọ́ Rẹ! Pa ayé mí mọ́ nínú òdodo Rẹ.

⁴¹Jẹ́ kí ìfẹ́ Rẹ tí kì í kùnà wá bá mi, OLÚWA, ìgbàlà Rẹ gẹ́gẹ́ bí ìpinnu Rẹ;

⁴²Nígbà náà ni èmi yóò dá ẹni tí ń sọ̀rọ̀ ẹ̀gàn sí mi lóhùn, nítorí èmi gbẹ́kẹ̀lé ọ̀rọ̀ Rẹ.

⁴³Má ṣe gba ọ̀rọ̀ òtítọ́ láti ẹnu mi nítorí èmi ti gbé ìrètí mi sínú àṣẹ Rẹ

⁴⁴Èmi yóò máa gbọ́ràn sí òfin Rẹ nígbà gbogbo láé àti láéláé.

⁴⁵Èmi yóò máa rìn káàkiri ní òmìnira, nítorí èmi ti kígbe ẹ̀kọ́ Rẹ̀ jáde.

⁴⁶Èmi yóò sọ̀rọ̀ òfin Rẹ níwájú àwọn ọba ojú kì yóò sì tì mí,

⁴⁷Nítorí èmi ní inú dídùn nínú àṣẹ Rẹ nítórí èmi ni ìfẹ́ wọn.

⁴⁸Èmi gbé ọwọ̀ mi sókè nítorí àṣẹ Rẹ, èyí tí èmi fẹ́ràn, èmi sì ń ṣe àsàrò òfin Rẹ̀.

⁴⁹Rántí ọ̀rọ̀ Rẹ̀ sí ìránṣẹ́ Rẹ, nítorí ìwọ ti fún mi ní ìrètí.

⁵⁰Ìtùnú mi nínú ìpọ́njú mi ni èyí: ìpinu Rẹ pa ayé mi mọ́.

⁵¹Àwọn agbéraga fi mi ṣe ẹlẹ́yà láì dádúró, ṣùgbọ́n èmi kò padà nínú òfin Rẹ.

⁵²Èmi rántí àwọn òfin Rẹ ìgbàanì, OLÚWA, èmi sì rí ìtùnú nínú wọn.

⁵³Ìbínú dìmí mú ṣinṣin nítorí àwọn ẹni búburú tí wọ́n ti kọ òfin Rẹ sílẹ̀.

⁵⁴Òfin Rẹ ni ọ̀rọ̀ ìpìlẹ̀ orin mi níbikíbi tí èmi ń gbé.

⁵⁵Ní òru èmi rántí orúkọ Rẹ, OLÚWA, èmi yóò sì pa òfin Rẹ mọ́

⁵⁶nitori ti mo gba ẹ̀kọ́ Rẹ gbọ́.

⁵⁷Ìwọ ni ìpín mi, OLÚWA: èmi ti pinnu láti tẹríba sí ọ̀rọ̀ Rẹ.

⁵⁸Èmi ti wá ojú Rẹ pẹ̀lú gbogbo ọkàn mi: fún mi ní oore ọ̀fẹ́ gẹ́gẹ́ bí ìpinnu Rẹ.

⁵⁹Èmi ti kíyèsí ọ̀nà mi èmi sì ti gbé ìgbésẹ̀ mi sí òfin Rẹ.

⁶⁰Èmi yóò yára, ń kò ni lọ́ra láti gbọ́ràn sí àṣẹ Rẹ.

⁶¹Bí ó tilẹ̀ jẹ́ pé àwọn ẹni búburú dì mí pẹ̀lú okùn, èmi kò ní gbàgbé òfin Rẹ.

⁶²Ní àárin ọ̀gànjọ́ òru èmi dìde láti fi ọpẹ́ fún ọ nítorí òfin òdodo Rẹ̀.

⁶³Èmi jẹ́ ọ̀rẹ́ sí gbogbo àwọn tí ó bẹ̀rù Rẹ, sí gbogbo àwọn tí ń tẹ̀lé ẹ̀kọ́ Rẹ̀.

⁶⁴Ayé kún fún ìfẹ́ Rẹ OLÚWA Kọ́ mi ní òfin Rẹ.

⁶⁵Ṣe rere sí ìránṣẹ́ Rẹ gẹ́gẹ́ bí ọ̀rọ̀ Rẹ, OLÚWA.

⁶⁶Kọ́ mi ni ìmọ̀ àti ìdájọ́ rere, nítorí mo gbàgbọ́ nínú àṣẹ Rẹ.

⁶⁷Kí a tó pọ́n mi lójú èmi ti sìnà, ṣùgbọ́n ni ìsinsinyí èmi gbọ́ràn sí ọ̀rọ̀ Rẹ̀.

⁶⁸Ìwọ dára, ohun tí ìwọ sì ń ṣe rere ni; kọ́ mi ní ìlànà Rẹ.

⁶⁹Bí ó tilẹ̀ jẹ́ pé àwọn agbéraga ti Rẹ̀ mí pẹ̀lú èké èmi pa ẹ̀kọ́ Rẹ mọ́ pẹ̀lú gbogbo ọkàn mi.

⁷⁰Ọkàn wọn yigbì kò sì ní àánú, ṣùgbọ́n èmi ní inú dídùn nínú òfin Rẹ.

⁷¹Ó dára fún mi kí a pọ́n mi lójú nítorí kí èmi lè kọ́ òfin Rẹ.

⁷²Òfin tí ó jáde láti ẹnu Rẹ ju iyebíye sí mi lọ ó ju ẹgbẹ̀rún ẹyọ fàdákà àti wúrà lọ

⁷³Ọwọ́ Rẹ ní ó dá mi tí ó sì mọ mí; fún mi ní òye láti kọ́ àṣẹ Rẹ.

⁷⁴Jẹ́ kí gbogbo àwọn tí ó bẹ̀rù Rẹ máa yọ̀ nígbà tí wọ́n bá rí mi, nítorí èmi ti mú ìrètí mi sínú ọ̀rọ̀ Rẹ.

⁷⁵Èmi mọ̀, OLÚWA, nítorí òfin Rẹ òdodo ni, àti ní òtítọ́ ni ìwọ pọ́n mi lójú.

⁷⁶Kí ìfẹ́ Rẹ tí kì í kùnà jẹ́ ìtùnú mi, gẹ́gẹ́ bí ìpinu Rẹ sí ìránṣẹ́ Rẹ.

⁷⁷Jẹ́ kí àánú Rẹ kí ó tọ̀ò mí wá kí èmi kí ó lè yè, nítorí òfin Rẹ̀ jẹ́ ìdùnnú mi.

⁷⁸Kí ojú kí ó ti àwọn agbéraga nítorí wọn pamí lára láìnídìí ṣùgbọ́n èmi yóò máa ṣe àṣàrò nínú ẹ̀kọ́ Rẹ̀.

⁷⁹Kí àwọn tí ó bẹ̀rù Rẹ yí padà sí mí, àwọn tí ó ní òye òfin Rẹ.

⁸⁰Jẹ́ kí ọkàn mi wà láìlẹ́bi sí òfin Rẹ, kí ojú kí ó má ṣe tì mí.

⁸¹Ọkàn mi ń fojú sọ́nà nítorí ìgbàlà Rẹ, ṣùgbọ́n èmi tí mú ìrètí mi sínú ọ̀rọ̀ Rẹ.

⁸²Ojú mi kùnà, pẹ̀lú wí wo ìpinu Rẹ; èmi wí pé, “Nígbà wo ni ìwọ yóò tù mí nínú?”

⁸³Bí ó tilẹ̀ jẹ́ pé èmi dàbí àmọ́ wáìnì nínú èéfín, èmi kò gbàgbé òfin Rẹ.

⁸⁴Báwo ni ìránṣẹ́ Rẹ̀ yóò ṣe dúró pẹ́ tó? Nígbà wo ni ìwọ yóò bá àwọn tí ń ṣe inúnibíni sí mi wí?

⁸⁵Àwọn agbéraga wa ihò ìṣubú fún mi, tí ó lòdì sí òfin Rẹ.

⁸⁶Gbogbo àsẹ Rẹ yẹ ní ìgbẹ́kẹ̀lé: rànmílọ́wọ́, nítorí ènìyàn ń ṣe inúnibíni sí mi láì nídìí.

⁸⁷Wọ́n fẹ́rẹ̀ẹ́ pa mí rẹ́ kúrò nínú ayé, ṣùgbọ́n èmi kò kọ̀ ẹ̀kọ́ Rẹ.

⁸⁸Pa ayé mi mọ́ gẹ́gẹ́ bí ìfẹ́ Rẹ, èmi yóò sì gba ẹ̀rí ẹnu Rẹ̀ gbọ́.

⁸⁹Ọ̀rọ̀ Rẹ, OLÚWA, títí láé ni; ó dúró ṣinṣin ní ọ̀run

⁹⁰Òtítọ́ Rẹ̀ ń lọ dé gbogbo ìran dé ìran; ìwọ ti dá ayé, ó sì dúró ṣinṣin.

⁹¹Òfin Rẹ dúró di òní nítorí ohun gbogbo ń sìn ọ́.

⁹²Bí òfin Rẹ̀ kò bá jẹ́ dídùn inú mi, èmi ìbá ti ṣègbé nínú ìpọ́njú mi.

⁹³Èmi kì yóò gbàgbé ẹ̀kọ́ Rẹ láé, nítorí nípa wọn ni ìwọ ti pa ayé mi mọ́

⁹⁴Gbà mí, nítorí èmi jẹ́ tìrẹ èmi ti wá ẹ̀kọ́ Rẹ.

⁹⁵Àwọn ẹni búburú dúró láti pa mí run, ṣùgbọ́n èmi yóò kíyèsí ẹ̀rí Rẹ.

⁹⁶Sí ohun pípé gbogbo èmi ti rí òpin; ṣùgbọ́n àṣẹ Rẹ aláìlópin ni.

⁹⁷Báwo ni èmi ti fẹ́ òfin Rẹ tó! Èmi ń ṣe àṣàrò nínú Rẹ̀ ní gbogbo ọjọ́ pípẹ́ wá.

⁹⁸Àṣẹ Rẹ mú mi gbọ́n ju àwọn ọ̀ta mi lọ, nítorí wọ́n wà pẹ̀lú mi láé.

⁹⁹Èmi ní iyè ińu ju gbogbo olùkọ́ mi lọ, nítorí èmi ń ṣe àṣàrò nínú òfin Rẹ.

¹⁰⁰Èmi ni òye ju àwọn àgbà lọ, nítorí mo gba ẹ̀kọ́ Rẹ.

¹⁰¹Èmi ti pa ẹsẹ̀ mi mọ́ nínú gbogbo ọ̀nà ibi nítorí kí èmi lè gba ọ̀rọ̀ Rẹ.

¹⁰²Èmi kò yà kúrò nínú òfin Rẹ, nítorí ìwọ fún rarẹ̀ ni ó kọ́ mi.

¹⁰³Báwo ni ọ̀rọ̀ Rẹ̀ ṣe dùn mọ́ mi lẹ́nu tó, ó dùn ju oyin lọ ní ẹnu mi!

¹⁰⁴Èmi rí òye gbà nínú ẹ̀kọ́ Rẹ; nítorí náà èmi kórìíra gbogbo ọ̀nà tí kò tọ́.

¹⁰⁵Ọ̀rọ̀ Rẹ ni ó ṣe fítílà sí ẹṣẹ̀ mi àti ìmọ́lẹ̀ sí ipa ọ̀nà mi

¹⁰⁶Èmi ti ṣe ìbúra èmi sì ti tẹnumọ́ ọn wí pé èmi yóò máa tẹ̀lé òfin òdodo Rẹ.

¹⁰⁷A pọ́n mi lójú gidigidi; OLÚWA, sọ mi di ààyè, gẹ́gẹ́ bi ọ̀rọ̀ Rẹ

¹⁰⁸OLÚWA, gba ìyìn àtinúwá ẹnu mi, kí o sì kọ́ mi ní òfin Rẹ̀.

¹⁰⁹Bí ó tilẹ̀ jẹ́ pé ayé mi wà ni ọwọ́ mi nígbà gbogbo, èmi kò ní gbàgbé òfin Rẹ.

¹¹⁰Àwọn ẹni búburú ti dẹ okùn sílẹ̀ fún mi, ṣùgbọ́n èmi kò sìnà kúrò nínú ẹ̀kọ́ Rẹ.

¹¹¹Òfin Rẹ ni ogún mi láéláé; àwọn ni ayọ̀ ọkàn mi.

¹¹²Ọkàn mi ti lé pípa òfin Rẹ mọ́ láé dé òpin.

¹¹³Èmi kóríra àwọn ọlọ́kàn méjì, ṣùgbọ́n èmi fẹ́ òfin Rẹ.

¹¹⁴Ìwọ ni ààbò mi àti aṣà mi; èmi ti mú ìrètí mi sínú ọ̀rọ̀ Rẹ.

¹¹⁵Ẹ kúrò lọ́dọ̀ mi, ẹ̀yin olùṣe búburú, kí èmi lè pa àṣẹ Ọlọ́run mi mọ́!

¹¹⁶Gbé mi sókè gẹ́gẹ́ bí ọ̀rọ̀ Rẹ, kí èmi kí ó lè yè Má sì jẹ́ kí ojú ìrètí mi kí ó tì mí.

¹¹⁷Gbé mi sókè, èmí yóò sì wa láìléwu; nígbà gbogbo ni èmi yóò máa júbà òfin Rẹ.

¹¹⁸Ìwọ kọ gbogbo àwọn tí ó sìnà kúrò nínú òfin Rẹ, nítorí ẹ̀tàn wọn asán ni.

¹¹⁹Gbogbo àwọn ẹni búburú ní ayé ni ìwọ yọ kúrò bí i ìdàrọ́; nítorí náà, èmi fẹ́ òfin ẹ̀.

¹²⁰Ara mi wárìrì ní ìbẹ̀rù nítorí Rẹ̀: èmi dúró ní ìbẹ̀rù òfin Rẹ

¹²¹Èmi ti ṣe ohun tí i ṣe òdodo àti ẹ̀tọ́: má ṣe fi mi sílẹ̀ fún àwọn tó ń ni mí lára.

¹²²Mú kí àlàáfíà ìránṣẹ́ Rẹ dájú: má ṣe jẹ́ kí àwọn agbéraga ni mi lára.

¹²³Ojú mi kùnà, fún wí wo ìgbàlà Rẹ, fún wíwo ìpinu òdodo Rẹ.

¹²⁴Ṣe pẹ̀lú ìránṣẹ́ Rẹ gẹ́gẹ́ bí dídúró ṣinṣin ìfẹ́ Rẹ kí o sì kọ́ mi ní àṣẹ Rẹ.

¹²⁵Èmi ni ìránṣẹ́ Rẹ; ẹ fún mi ní òye kí èmi lè ní òye òfin Rẹ

¹²⁶Ó tó àsìkò fún ọ láti ṣe iṣẹ́, OLÚWA; nítorí òfin Rẹ ti fọ́.

¹²⁷Nítorí èmi fẹ́ràn àsẹ Rẹ ju wúrà, àní ju wúrà dídára lọ,

¹²⁸Nítorí èmi kíyèsí gbogbo ẹ̀kọ́ òtítọ́ Rẹ̀, èmi kórìíra gbogbo ipa ọ̀nà búburú.

¹²⁹Òfin Rẹ̀ ìyanu ni: nítorí náà èmi gbà wọ́n gbọ́.

¹³⁰Ìṣípayá ọ̀rọ̀ Rẹ̀ mú ìmọ́lẹ̀ wá; ó fi òye fún àwọn òpè.

¹³¹Èmi ya ẹnu mi mo sì mí hẹlẹ, nítorí èmi fojú sọ́nà sí ṣsẹ Rẹ.

¹³²Yí padà sí mi kí o sì ṣàánú fún mi, bí ìwọ ṣe máa ń ṣe nígbà gbogbo sí àwọn tí ó fẹ́ràn orúkọ Rẹ.

¹³³Fi ìsísẹ̀ mi múlẹ̀ nínú ọ̀rọ̀ Rẹ, má ṣe jẹ́ kí ẹ̀ṣẹ̀ borí mi.

¹³⁴Rà mí padà lọ́wọ́ aninilára ènìyàn, kí èmi lè gbọ́ ẹ̀kọ́ Rẹ.

¹³⁵Jẹ́ kí ojú Rẹ kí ó tàn sí ìránṣẹ́ Rẹ lára kí ó sì kọ́ mi ní àsẹ Rẹ.

¹³⁶Omijé sàn jáde ní ojú mi, nítorí wọn kò gba òfin Rẹ̀ jẹ́ òtítọ́.

¹³⁷Olódodo ni ìwọ OLÚWA ìdájọ́ rẹ sì dúró sinsin

¹³⁸Òfin ti ìwọ gbé kalẹ̀ jẹ́ òdodo: wọ́n yẹ ni ìgbẹ́kẹ̀lé.

¹³⁹Ìtara mi ti pami run, nítorí àwọn ọ̀ta mi fi ojú fo ọ̀rọ̀ Rẹ dá.

¹⁴⁰Wọ́n ti dán ìpinnu Rẹ wò pátapáta ìránṣẹ́ Rẹ sì fẹ́ràn wọ́n.

¹⁴¹Bí ó tilẹ̀ jẹ́ pé èmi jẹ́ onírẹ̀lẹ̀ àti ẹni ẹ̀gàn èmi kò ni gbàgbé ẹ̀kọ́ Rẹ.

¹⁴²Òdodo Rẹ wà títí láé òtítọ́ ni òfin Rẹ̀.

¹⁴³Ìyọnu àti ìpọ́njú wá sórí mi, ṣùgbọ́n àsẹ Rẹ ni inú dídùn mi,

¹⁴⁴Òfin Rẹ jẹ́ òtítọ́ láé; fún mi ní òyé kí èmi lè yè.

¹⁴⁵èmi kígbe pẹ̀lú gbogbo ọkàn mi: dámi lóhùn OLÚWA, èmi yóò sì gbọ́ràn sí àsẹ Rẹ.

¹⁴⁶Èmi kígbe pè ọ́; gbà mí èmi yóò sì pa òfin Rẹ mọ́.

¹⁴⁷Èmi dìde ṣáájú àfẹ̀mọ́júmọ́ èmi ké fún ìràn lọ́wọ́; èmi ti mú ìrètí mi sínú ọ̀rọ̀ Rẹ.

¹⁴⁸Ojú mi ṣááju ìsọ́ òru, nítorí kí èmi lè ṣe àṣàrò nínú ọ̀rọ̀ r.

¹⁴⁹Gbọ́ ohùn mi ní ìṣọ̀kan pẹ̀lú ìfẹ́ Rẹ: pa ayé mí mọ́, OLÚWA, gẹ́gẹ́ bí òfin Rẹ.

¹⁵⁰Àwọn tí ń gbìmọ̀ ìlànà búburú wà ní tòòsí, ṣùgbọ́n wọ́n jìnnà sí òfin Rẹ.

¹⁵¹Ṣíbẹ̀ ìwọ wà ní tòsí, OLÚWA, àti gbogbo àsẹ Rẹ jẹ́ òtítọ́.

¹⁵²Láti ọjọ́ pípẹ́ wá èmi ti kọ́ nínú òfin Rẹ tí ìwọ ti fi ìdí wọn múlẹ̀ láéláé.

¹⁵³Wo ìpọ́njú mi kí o sì gbà mí, nítorí èmi kò gbàgbé òfin Rẹ.

¹⁵⁴Gba ẹjọ́ mi rò kí ó sì rà mí padà; pa ayé mi mọ́ gẹ́gẹ́ bí ìpinnu Rẹ.

¹⁵⁵Ìgbàlà jìnnà sí àwọn ẹni búburú nítorí wọn kò wá àṣẹ Rẹ.

¹⁵⁶Ìyọ́nú Rẹ̀ tóbi, OLÚWA; pa ayé mi mọ́ gẹ́gẹ́ bí òfin Rẹ.

¹⁵⁷Ọ̀pọ̀lọpọ̀ ni àwọn ọ̀ta tí wọ́n ń ṣe inúnibíni sí mi, ṣùgbọ́n èmi kò tíì yí padà kúrò nínú òfin Rẹ.

¹⁵⁸Èmi wọ̀ àwọn ẹlẹ́tàn, inú mi sì bàjẹ́ nítorí wọn kò gba ọ̀rọ̀ Rẹ gbọ́.

¹⁵⁹Wo bí èmi ṣe fẹ́ràn ẹ̀kọ́ Rẹ; pa ayé mi mọ́, OLÚWA, gẹ́gẹ́ bí ìfẹ́ Rẹ.

¹⁶⁰Òtítọ́ ni gbogbo ọ̀rọ̀ Rẹ; gbogbo òfin òdodo Rẹ láéláé ni.

¹⁶¹Àwọn alákòóso ṣe inúnibíni sí mi láìnídìí, ṣùgbọ́n ọkàn mi wárìrì sí ọ̀rọ̀ Rẹ.

¹⁶²Èmi yọ̀ nínú ìpinnu Rẹ bí ẹni tí ó rí ìkógun púpọ̀.

¹⁶³Èmi kórìíra mo sì gba èké ṣíṣe ṣùgbọ́n mo fẹ́ràn òfin Rẹ.

¹⁶⁴Èmi yìn ọ́ ní ìgbà méje lójúmọ́ nítorí òfin òdodo Rẹ.

¹⁶⁵Àlàáfíà púpọ̀ wà fún àwọn tí ó ní ìfẹ́ sí òfin Rẹ, kò sì si ohun tí ó lè mú wọn kọsẹ̀.

¹⁶⁶Èmi yóò dúró de ìgbàlà Rẹ, OLÚWA, èmi yóò sì tẹ̀lé àṣẹ Rẹ.

¹⁶⁷Èmi gba òfin Rẹ gbọ́, nítorí mo fẹ́ràn wọn púpọ̀ púpọ̀

¹⁶⁸Èmi ṣe ìgbọ́ràn sí ẹ̀kọ́ Rẹ àti òfin Rẹ, nítorí ìwọ mọ gbogbo ọ̀nà mi.

¹⁶⁹Jẹ́ kí igbe mi wá sí iwájú Rẹ, OLÚWA; fún mi ní òye gẹ́gẹ́ bí ọ̀rọ̀ Rẹ.

¹⁷⁰Jẹ́ kí ẹ̀bẹ̀ mi wá sí iwájú Rẹ; gbà mí gẹ́gẹ́ bí ìpinnu Rẹ.

¹⁷¹Ètè mi yóò sọ ìyin jáde, nítorí ìwọ kọ́ mi ní ọ̀nà Rẹ.

¹⁷²Jẹ́ kí ahọ́n mi kọ orin ọ̀rọ̀ Rẹ, nítorí gbogbo àṣẹ Rẹ jẹ́ òdodo.

¹⁷³Jẹ́ kí ọwọ́ Rẹ ṣetan láti rànmílọ́wọ́, nítorí èmi ti yan ẹ̀kọ́ Rẹ.

¹⁷⁴Èmi wo ọ̀nà fún ìgbàlà Rẹ, OLÚWA, àti òfin Rẹ jẹ́ dídùn inú mi.

¹⁷⁵Jẹ́ kí èmi wà láàyè ki èmi lè yìn ọ́, kí o sì jẹ́ kí òfin Rẹ mú mi dúró.

¹⁷⁶Èmí ti sìnà bí àgùntàn tí ó sọnùú wá ìránṣẹ́ Rẹ, nítorí èmi kò gbàgbé àṣẹ Rẹ.