Ìwé Sáàmù 18:1-50 BYB2014 - Bible AI

¹ⓐ Mo fẹ́ ọ, OLÚWA, agbára mi.

²OLÚWA ni àpáta àti odi mi, àti olùgbàlà mi; Ọlọ́run mi ni àpáta mi, ẹni tí mo fi ṣe ibi ìsádi mi. Òun ni àpáta ààbò àti agbára ìgbàlà mi àti ibi ìsádi mi.

³Mo ké pe OLÚWA, ẹni tí ìyìn yẹ fún, a ó sì gbàmí lọ́wọ́ àwọn ọ̀ta à mi.

³

⁴Ìrora ikú yí mi kà, àti ìsàn omi àwọn ènìyàn búbúrú dẹ́rùbà mí.

⁵Okùn isà òkú yí mi ká, ìkẹ́kùn ikú dojúkọ mí.

⁶Nínú ìpọ́njú mo ké pe OLÚWA; Mo sunkún sí OLÚWA mi fún ìrànlọ́wọ́. Láti inú tẹ́ḿpìlì Rẹ̀, ó gbọ́ igbe mi; ẹkún mi wá sí iwájú Rẹ̀, sí inú etí Rẹ̀.

⁶

⁷Ayé wárìrì, ó sì mì tìtì pẹ̀lú, ìpìlẹ̀, àwọn òkè gíga sì sídìí; wọ́n wárìrì nítorí tí ó ń bínú.

⁸Èéfín ti ihò imú Rẹ̀ jáde wá; Iná ajónirun ti ẹnu Rẹ̀ jáde wá, ẹ̀yin iná bú jáde láti inú Rẹ̀.

⁹Ó pín àwọn ọ̀run, Ó sì jáde wá; àwọsánmọ̀ dúdú sì wà ní abẹ́ ẹsẹ̀ Rẹ̀.

¹⁰Ó gun orí kérúbù, ó sì fò; ó ń rá bàbà lórí ìyẹ́ apá afẹ́fẹ́.

¹¹Ó fi òkùnkùn ṣe ibojì Rẹ̀, ó fi ṣe ìbòrí yí ara Rẹ̀ ká kùrúkùrù òjò dúdú ní ojú ọ̀run.

¹²Nípa ìmọ́lẹ̀ iwájú Rẹ̀, àwọ̀sánmà ṣíṣú dudu Rẹ kọja lọ pẹ̀lú yìnyín àti ẹyìn iná

¹³OLÚWA sán àrá láti ọ̀run wá; Ohùn ẹni gíga jùlọ tí ń dún.

¹⁴Ó ta àwọn ọfà Rẹ̀, ó sì tú àwọn ọ̀ta náà ká, ọfà mọ̀nàmọ́ná ńlá sì dà wọ́n rú.

¹⁵A sì fi ìṣàlẹ̀ àwọn òkun hàn, a sì rí àwọn ìpìlẹ̀ ayé nípa ìbáwí Rẹ̀, OLÚWA, nípa fífún èémí ihò imú Rẹ.

¹⁶Ó sọ̀kalẹ̀ láti ibi gíga ó sì dì mí mú; Ó fà mí jáde láti inú omi jínjìn.

¹⁷Ó gbà mí kúrò lọ́wọ́ ọ̀ta mi alágbára, láti ọwọ́ àwọn ọ̀ta, ti ó lágbára jù fún mi.

¹⁸Wọ́n dojúkọ mí ní ọjọ́ ìpọ́njú mi; ṣùgbọ́n OLÚWA ni alàtìlẹ́yìn mi.

¹⁹Ó mú mi jáde wá sínú ibi ńlá; Ó gbà mí nítorí tí ó ní inúdídùn sí mi.

¹⁹

²⁰OLÚWA ti hùwà sí mi gẹ́gẹ́ bí òdodo mi; gẹ́gẹ́ bí mímọ́ ọwọ́ mi, ó ti fi èrè fún mi

²¹Nítorí mo ti pa ọ̀nà OLÚWA mọ́; èmi kò ṣe búbúrú nípa yíyí padà kúrò lọ́dọ̀ Ọlọ́run mi

²²Gbogbo òfin Rẹ̀ ni ó wà níwájú mi; èmi kò sì yípadà kúrò nínú ìlànà Rẹ̀.

²³Mo ti jẹ́ aláìlẹ́bi níwájú Rẹ̀; mo sì pa ara mi mọ́ kúrò nínú ẹ̀ṣẹ̀.

²⁴OLÚWA san ẹ̀ṣan fún mi gẹ́gẹ́ bí òdodo mi; gẹ́gẹ́ bí mímọ́ ọwọ́ mi níwájú Rẹ̀.

²⁴

²⁵Sí olóòótọ́ ìwọ ó fi ara Rẹ̀ hàn ní olóòtọ́, sí aláìlẹ́bi, ìwọ ó fi ara Rẹ̀ hàn ní aláìlẹ́bi,

²⁶Sí ọlọ́kan mímọ́, ìwọ ó fi ara Rẹ̀ hàn ní ọlọ́kàn mímọ́, ṣùgbọ́n sí ọlọ́kàn-wíwọ́, ìwọ ó fi ara Rẹ̀ hàn ní òǹrorò.

²⁷O pa onírẹ̀lẹ̀ mọ́, ṣùgbọ́n o Rẹ̀ àwọn ti ń gbéraga sílẹ̀.

²⁸Ìwọ, OLÚWA, jẹ́ kí fìtílà mi kí ó máa tàn; Ọlọ́run mi, yí òkùnkùn mi padà sí ìmọ́lẹ̀.

²⁸

²⁹Pẹ̀lú ìrànlọ́wọ́ Rẹ̀, èmi ṣare la ogun lọ; pẹ̀lú Ọlọ́run mi mo lè fo odi kan

³⁰Bí ó ṣe ti Ọlọ́run mi, ọ̀nà Rẹ̀ pé, a ti rídìí ọ̀rọ̀ OLÚWA òun ni àpáta ààbò fún gbogbo àwọn tí ó fi ṣe ààbò.

³¹Nítorí ta ni ṣe Ọlọ́run bí kò ṣe OLÚWA? Ta ní àpátà bí kò ṣe OLÚWA wa?

³²Ọlọ́run ni ẹni tí ó fi agbára dì mí ní àmùrè ó sì mú ọ̀nà mi pé.

³³Ó ṣe ẹsẹ̀ mi gẹ́gẹ́ bi ẹsẹ̀ àgbọ̀nrín; ó jẹ́ ki n lè dúró lórí ibi gíga.

³⁴Ó kọ́ ọwọ́ mi ni ogun jíja; apá mi lè tẹ ọrùn idẹ

³⁵Ìwọ fi àṣà ìṣẹ́gun Rẹ̀ fún mi, ọwọ́ ọ̀tún Rẹ̀ gbé mí sókè; àti ìwà ìpẹ̀lẹ́ Rẹ̀ sọ mi di alágbára àti ẹni ńlá.

³⁶Ìwọ sọ ìrìn ẹsẹ mi di ńlá ní ìṣàlẹ̀ mi, kí kókó-ẹsẹ̀ mi má ṣe yẹ̀.

³⁶

³⁷Èmi lépa àwọn ọ̀tá mi èmi sì bá wọn èmi kò sì padà lẹ́yìn wọn títí a fi run wọ́n.

³⁸Èmi ṣá wọn ní ọgbẹ́ tí wọn ko fi le è dìde; Wọ́n subú ní abẹ́ ẹsẹ̀ mi.

³⁹Nítorí ìwọ fi agbára dì mí ní amùrè fún ogun náà; ìwọ ti mú àwọn tí ó dìde si mí tẹríba ní abẹ́ ẹsẹ̀ mi

⁴⁰Ìwọ yí ẹ̀yìn àwọn ọ̀ta mí padà sí mi èmi sì pa àwọn tí ó kóríra mí run.

⁴¹Wọ́n kígbé fún ìrànlọ́wọ́, ṣùgbọ́n kò sí ẹnìkan tí yóò rànwọ́n lọ́wọ́. àní sí OLÚWA, ṣùgbọ́n kò dá wọn lóhùn

⁴²Mo lù wọ́n gẹ́gẹ́ bí eruku níwájú afẹ́fẹ́; mo dà wọ́n síta gẹ́gẹ́ bí ẹrọ̀fọ̀.

⁴³Ìwọ ti gbà mí lọ́wọ́ ìkọlù àwọn ènìyàn; Ìwọ ti fi mí ṣe olórí àwọn orílẹ́ èdè; àwọn ènìyàn ti èmi kò mọ, yóò sì máa sìn mí.

⁴⁴Wéré ti wọ́n gbọ́ ohùn mi, wọ́n gbọ́ gbàmí; àwọn ọmọ àjèjì yóò fi ẹ̀tàn tẹríba fún mi.

⁴⁵Àyà yóò pá àlejò; wọn yóò sì fi ìbẹ̀rù jáde láti ibi kọ́lọ́fín wọn.

⁴⁵

⁴⁶OLÚWA wà láàyè! Olùbùkún ni àpáta mi! Gbígbé ga ní Ọlọ́run Olùgbàlà mi.

⁴⁶

⁴⁷Òun ni Ọlọ́run tí ó ń gbẹ̀san mi, tí ó sì ń ṣẹ́gun àwọn orílẹ̀ èdè tí ó wà ní abẹ́ mi,

⁴⁸tí ó pa mí mọ́ kúrò lọ́wọ́ àwọn ọ̀tá mí. Ìwọ gbé mi ga ju àwọn tí ó dìde sí mi lọ; lọ́wọ́ àwọn ènìyàn alágbára ni ìwọ ti gbà mí.

⁴⁹ⓑ Títí láéláé èmi yóò máa yìn ọ́ láàrin àwọn orílẹ̀ èdè, ìwọ OLÚWA; Èmi yóò sì máa kọ orin ìyìn sí orúkọ Rẹ.

⁵⁰Ó fún Ọba Rẹ̀ ni ìṣẹ́gun ńlá; ó fi ìkáànú àìṣẹ̀tàn fún ẹni-àmì-òróró Rẹ̀, fún Dáfídì àti ìran Rẹ̀ títí láé.