Ìwé Sáàmù 35:1-28 BYB2014 - Bible AI

¹OLÚWA, gbógun ti àwọn tí ń gbógun tì mí; kí o sì kọ ojú ìjà sí àwọn tí ó ń bá mi í jà!

²Di aṣà àti àpáta mú, kí o sì dìde fún ìrànlọ́wọ́ mi!

³Fa idà àti ọ̀kọ̀ yọ kí o sì dojúkọ àwọn tí ń lé mi; sọ fún ọkàn mi pé, “Èmi ni ìgbàlà Rẹ.”

⁴Kí wọn kí ó dààmú, kí a sì ti àwọn tí ń lépa ọkàn mi lójú: kí a sì mú wọn padà, kí a sì dààmú àwọn tí ń gbérò ìpalára mi.

⁵Jẹ́ kí wọn dà bí ìyàngbò níwájú afẹ́fẹ́, kí ángẹ́lì OLÚWA kí ó máa lé wọn kiri.

⁶Jẹ́ kí ọ̀nà wọn kí ó sókùnkùn kí ó sì máa yọ́, kí áńgẹ́lì OLÚWA kí ó máa lépa wọn!

⁷Nítorí pé, ní àìnídìí ní wọ́n dẹ àwọ̀n wọn sílẹ̀ fún mi, ní àìnídìí ni wọ́n wa kòtò fún ọkàn mi.

⁸Jẹ́ kí ìparun kí ó wá sí orí wọn lójijì. Àwọ̀n Rẹ̀ tí ó dẹ pamọ́, kí ó mú àwọn tìkálára wọn; kí wọn ṣubú sínú kòtò sí ìparun ara Rẹ̀.

⁹Nígbà náà ni ọkàn mi yóò yọ̀ nínú OLÚWA, àní ayọ̀ ńlá nínú ìgbàlà Rẹ̀.

¹⁰Gbogbo egúngún mi yóò wí pé, “ìwọ OLÚWA, ta ni ó dà bí i Rẹ̀? O gba talákà là lọ́wọ́ àwọn tí ó lágbára jù wọ́n lọ, talákà àti aláìní lọ́wọ́ ẹni tí ń fi ṣe ìkógun?”

¹⁰

¹¹Àwọn ẹlẹ́rìí èké dìde; wọ́n bi mi léèrè àwọn ohun tí èmi kò mọ̀.

¹²Wọ́n fi búburú san ire fún mi; láti sọ ọkàn mi di òfo.

¹³Ṣùgbọ́n bí ó ṣe ti èmi ni, nígbà tí wọn ń ṣe àìsàn, mo wọ aṣọ ọ̀fọ̀; mo fi ààwẹ̀ pọ́n ara mi lójú. Mo gba àdúrà pẹ̀lú ìtẹríba ní oókan àyà mi;

¹⁴bí i ẹni wí pé ọ̀rẹ́ tàbí ẹ̀gbọ́n mi ní wọ́n; mo ń lọọ́ kiri bí ẹni tí ń sọ̀fọ̀ fún ìyà Rẹ̀, tí o tẹríba nínú ìbànújẹ́.

¹⁵Ṣùgbọ́n nínú ìkọ̀sẹ̀ mi wọ́n kó ara wọn jọ wọ́n sì yọ̀, wọ́n kó ara wọn jọ sí mi; àní àwọn tí èmi kò mọ̀ wọ́n fà mí ya wọ́n kò sì dákẹ́.

¹⁶Àwọn àgàbàgebè ń ṣe yẹ̀yẹ́ mi ṣíwájú àti sí wájú síi wọ́n pa eyín wọn keke sí mi.

¹⁷Yóò ti pẹ́tó, ìwọ OLÚWA, tí ìwọ yóò máa wò wọ́n lọ? Yọ mí kúrò nínú ìparun wọn àní ẹ̀mí i mi kúrò lọ́wọ́ kìnnìún.

¹⁸Nígbà náà ni èmi yóò sọpẹ́ fún Ọ nínú àjọ ńlá; èmi yóò máa yìn Ọ́ ní àwùjọ ọ̀pọ̀ ènìyàn.

¹⁸

¹⁹ⓐ Má ṣe jẹ́ kí àwọn tí ń ṣe ọ̀tá mi kí ó yọ̀ lórí ì mi, tàbí àwọn tí ó kórìírá mi ní àìní dí máa sẹ́jú sí mi.

²⁰Nítorí pé wọn kò sọ ọ̀rọ̀ àlàáfíà, ṣùgbọ́n wọ́n lóyún ọ̀rọ̀ ẹ̀tàn sí àwọn ènìyàn dídákẹ́ ilẹ̀ náà.

²¹Wọ́n ya ẹnu wọn gbòòrò sí mi; wọ́n sọ wí pé, “Áà! Áà! Ojú wa sì ti rí i.”

²¹

²²Ìwọ́ ti ríi Ìwọ OLÚWA: Má ṣe dákẹ́! Ìwọ OLÚWA, Má ṣe jìnnà sí mi!

²³Jí dìde! Ru ara Rẹ̀ sókè fún ààbò mi, fún ìdí mi, Ọlọ́run mi àti OLÚWA mi!

²⁴Dá mi láre, ìwọ OLÚWA, Ọlọ́run mi, gẹ́gẹ́ bí òdodo Rẹ, kí o má sì ṣe jẹ́ kí wọn kí ó yọ̀ lórí mi!

²⁵Má ṣe jẹ́ kí wọn wí nínú ara wọn pé, “Áà! Àti rí ohun tí ọkàn wa ń fẹ́: Má ṣe jẹ kí wọn kí ó wí pé, a ti gbé e mì.”

²⁵

²⁶Kí ojú kí ó tì wọ́n, lí wọn kí ó sì dààmú pọ̀, tí ń yọ̀ sí ìyọnu mi kí a fi ìtìjú àti àbùkù wọ̀ wọ́n ní aṣọ tí ń gbéraga sí mi.

²⁷Jẹ́ kí àwọn tí ó fẹ́ ìdáláre mi fó fún ayọ̀ àti ìdùnnú, kí wọn máa sọ ọ́ titi lọ, pé gbígbéga ni “OLÚWA sí àlàáfíà ìránṣẹ Rẹ̀”.

²⁸Nígbà náà ni ahọ́n mi yóò máa sọ̀rọ̀ òdodo Rẹ, àti ìyìn Rẹ ní gbogbo ọjọ́.