Ìwé Sáàmù 40:1-17 BYB2014 - Bible AI

¹Mo fi pẹ̀lẹ́pẹ̀lẹ́ dúró de OLÚWA; ó sì dẹtí sí mi, ó sì gbọ́ ẹkún mi.

²Ó fà mí yọ gòkè láti inú ihò ìparun, láti inú ẹrẹ̀ pọ̀tọ̀pọ́tọ̀, ó sì fi ẹsẹ̀ mi lé orí àpáta, ó sì jẹ́ kí ìgbesẹ̀ mi wà láìfòyà.

³Ó fi orin titun sí mi lẹ́nu, àní orin ìyìn sí Ọlọ́run wa. Ọ̀pọ̀ yóò ríi wọn yóò sì bẹ̀rù, wọn yóò sì gbẹ́kẹ̀ lé OLÚWA.

³

⁴Ayọ̀ ni fún àwọn wọ̀n ọn-nì tí ó fi OLÚWA ṣe ìgbẹ́kẹ̀lé wọn tí wọn kò sì yípadà sí agbéraga, tàbí àwọn tí ó yapa lọ sí ọ̀dọ̀ ọlọ́run mìíràn.

⁵OLÚWA Ọlọ́run mi, Ọ̀pọ̀lọpọ̀ ni àwọn isẹ́ ìyanu tí ìwọ ti ṣe. Àwọn ohun tí ìwọ ti ṣètò sílẹ̀ fún wa; ni ẹnikẹ́ni kò le kà wọ́n fún ọ lẹ́sẹẹsẹ tí èmi yóò sì sọ̀rọ̀ wọn, wọn ju ohun tí ènìyàn leè kà lọ.

⁵

⁶ⓐ Ẹbọ àti ẹran ẹbọ ni ìwọ kò fẹ́, ìwọ ti sí mi ní etí. Ọrẹ ẹbọ sísun àti ẹbọ ẹ̀ṣẹ̀ ni ìwọ kò bèèrè.

⁷Nígbà náà ni mo wí pé, “Èmi nìyí; nínú ìwé kíkà nì a kọ ọ nípa temí wí pé.

⁸Mo ní inú dídùn láti ṣe ìfẹ́ ẹ̀ Rẹ, ìwọ Ọlọ́run mi; Òfin Rẹ̀ ń bẹ ní àyà mi.”

⁸

⁹Èmi ti sọ ìròyìn ayọ̀ ti ìgbàlà láàrin àwùjọ ńlá; wòó, èmi kò pa ètè mí mọ́, gẹ́gẹ́ bí ìwọ ti mọ̀, ìwọ OLÚWA.

¹⁰Èmi kò fi ìrànlọ́wọ́ ìgbàlà sin ní àyà mi, èmí ti sọ̀rọ̀ nípa òtítọ́ àti ìgbàlà Rẹ̀: èmi kò sì pa ìṣeun ìfẹ́ Rẹ̀ àti òtítọ́ Rẹ̀ mọ́ kúrò láàrin àwọn ìjọ ńlá.

¹⁰

¹¹Ìwọ má ṣe, fa àánú Rẹ̀ tí ó rọnú sẹ́yìn kúrò lọ́dọ̀ mi; OLÚWA jẹ́ kí ìṣeun ìfẹ́ Rẹ àti òtítọ́ Rẹ kí ó máa pa mí mọ́ títí ayérayé.

¹²Nítorí pé àìníye ibi ni ó yí mi káàkiri, ẹ̀ṣẹ̀ mi sì dì mọ́ mi, títí tí èmi kò fi ríran mọ́; wọ́n pọ̀ ju irun orí mi lọ, àti wí pé àyà mí ti kùnà.

¹²

¹³ⓑ Jẹ́ kí ó wù ọ́, ìwọ OLÚWA, láti gbà mí là; OLÚWA, yára láti ràn mí lọ́wọ́.

¹⁴Gbogbo àwọn wọ̀nnì ni kí ojú kí ó tì kí wọn kí ó sì dààmú àwọn tí ń wá ọkàn mi láti parun: jẹ́ kí a lé wọn padà sẹ́yìn ki á sì dójú tì wọ́n, àwọn tí n wá ìpalára mi.

¹⁵Jẹ́ kí àwọn tí ó wí fún mi pé, “Áà! Áá!” ó di ẹni àfọwọ́ rọ́ sẹ́yìn nítorí ìtijú wọn.

¹⁶Jẹ́ kí gbogbo àwọn tí ń wá ọ kí ó máa yọ̀ kí inú wọn sì máa dùn sí ọ; kí gbogbo àwọn tí ó sì fẹ́ ìgbàlà Rẹ kí o máa wí nígbà gbogbo pé, “Gbígbéga ni OLÚWA!”

¹⁶

¹⁷Bí ó ṣe ti èmi ni, talákà àti aláìní ni èmi, ṣùgbọ́n OLÚWA ń ṣe ìrántí mi. Ìwọ ni olùrànlọ́wọ́ mi àti ìgbàlà mi; Má ṣe jẹ́ kí ó pẹ́, ìwọ Ọlọ́run mi.