Ìwé Sáàmù 51:1-19 BYB2014 - Bible AI

¹Sàánú fún mi, Ọlọ́run, gẹ́gẹ́ bí ìdúró sinsin ìfẹ́ Rẹ̀, gẹ́gẹ́ bí ọ̀pọ̀ àánú Rẹ̀ kí o sì pa gbogbo ẹ̀ṣẹ̀ mi rẹ́.

²Wẹ gbogbo àìṣedédé mi nù kúrò kí o sì wẹ̀ mi mọ́ kúrò nínú ẹ̀ṣẹ̀ mi!

²

³Nítorí mo mọ̀ gbogbo ẹ̀ṣẹ̀ mi, nígbà gbogbo ni ẹ̀ṣẹ̀ mi wà níwájú mi.

⁴ⓐ Sí ọ, ìwọ nìkan soso, ni mo sẹ̀ sí ni mo sì ṣe búburú níwájú Rẹ̀, kí a lè dá ọ láre nígbà tí ìwọ bá ń sọ̀rọ̀ kí o sì le wà láìlẹ́bi, nígbà tí ìwọbá ń ṣe ìdájọ́.

⁵Ní tòótọ́, nínú ẹ̀ṣẹ̀ ni a ti bí mi, nínú ẹ̀ṣẹ̀ ni ìyá mí sì lóyún mi.

⁶Ní tòótọ́ ìwọ fẹ́ òtítọ́ ní inú; ìwọ kọ́ mi ní ọgbọ́n ní ìhà ìkọ̀ kọ̀.

⁶

⁷Wẹ̀ mí pẹ̀lú ewé ísópù, èmi yóò sì mọ́; fọ̀ mí, èmi yóò sì funfun ju sínóò lọ.

⁸Jẹ́ kí ń gbọ́ ayọ̀ àti inú dídùn; jẹ́ kí gbogbo egúngún tí ìwọ ti run kí ó máa yọ̀.

⁹Pa ojú Rẹ̀ mọ́ kúrò nínú ẹ̀ṣẹ̀ mi kí o sì pa gbogbo àwọn àìṣedéédé mi rẹ́.

⁹

¹⁰Dá ọkàn mímọ́ sí inú mi, Ọlọ́run, kí o sì tún ẹ̀mí dídúró ṣinṣin ṣe sínú mi.

¹¹Má ṣe jù mi nù kúrò níwájú Rẹ̀ kí o má ṣe gba ẹ̀mí mímọ́ Rẹ̀ lọ́wọ́ mi.

¹²Mú ayọ̀ ìgbàlà Rẹ̀ tọ̀ mí wá kí o sì fún mí ní ẹ̀mí ìfẹ́, tí yóò mú mi dúró.

¹³Nígbà náà ni èmi yóò máa kọ àwọn Olùrékọjá ní ọ̀nà Rẹ̀, àwọn ẹlẹ́sẹ̀ yóò sì yí padà sí ọ.

¹⁴Gbàmí kúrò lọ́wọ́ ẹ̀bi ẹ̀jẹ̀, Ọlọ́run, ìwọ Ọlọ́run ìgbàlà mi, ahọ́n mi yóò sì máa kọrin òdodo Rẹ kíkan.

¹⁵OLÚWA, sí mi ní ètè mi gbogbo, àti ẹnu mi yóò sì máa kéde ìyìn Rẹ̀.

¹⁶Nítorí ìwọ kò ní inú dídùn sí ẹbọ, tí èmi kò bá mú wá; Ìwọ kò ní inú dídùn sí ọọrẹ̀-ẹbọ sísun

¹⁷Ẹbọ Ọlọ́run ni ìròbínújẹ́ ọkan ìròbìnújẹ́ àti ìrora àyà.

¹⁷

¹⁸Ṣe rere ní dídùn inú Rẹ sí Síónì ṣe rere; tún odi Jérúsálẹ́mù mọ.

¹⁹Nígbà náà ni inú Rẹ yóò dùn sí ẹbọ òdodo, pẹ̀lú ọrẹ-ẹbọ sísun àti ọ̀tọ̀tọ̀ ọrẹ ẹbọ sísun, nígbà náà ni wọn yóò fi akọ màlúù rúbọ lórí pẹpẹ Rẹ̀.