Ìwé Sámúẹ́lì Kejì 22:1-51 BYB2014 - Bible AI

¹Dáfídì sì kọ ọ̀rọ̀ orin yìí sí OLÚWA ní ọjọ́ tí OLÚWA gbà á kúrò lọ́wọ́ gbogbo àwọn ọ̀ta rẹ̀, àti kúrò lọ́wọ́ Sọ́ọ̀lù.

²ⓐ Ó sì wí pé,

²“OLÚWA ni àpáta mi, àti Olùgbàlà mi;

³Ọlọ́run mi, àpáta mi, nínú ẹni tí èmi ní ààbò, àti ìwọ ìgbàlà mi, ibi ìsádi gíga mi, àti ibi ìlùmọ̀ mi, Olùgbàlà mi; ìwọ ni ó ti gbà mí kúrò lọ́wọ́ ìwà ipá.

⁴Èmi képe OLÚWA, tí ó yẹ láti máa yìn, ó sì gbà mí lọ́wọ́ àwọn ọ̀tá mi.

⁴

⁵“Nígbà tí ìbìlù ìrora ikú yí mi káàkiri; tí àwọn ìṣàn ènìyàn búburú dẹ́rùbà mí.

⁶Ọ̀já isà-òkú yí mi káàkiri; ìkẹ́kùn ikú dojú kọ mí.

⁷Nínú ìpọ́njú mi, èmi ké pé OLÚWA, èmi sì gbé ohùn mi sókè sí Ọlọ́run mi. Ó sí gbóhùn mi láti tẹ́ḿpìlì rẹ̀ igbe mí wọ etí rẹ̀.

⁷

⁸“Ilẹ̀ sì mì, ó sì wárìrì; ìpìlẹ̀ ọ̀run wárìrì, ó sì mì, nítorí tí ó bínú.

⁹Èéfín sì jáde láti ihò-imú rẹ̀ wá; iná láti ẹnu rẹ̀ wá, ó sì ń jónirun, ẹ̀yín sì ń ràn nípasẹ rẹ̀.

¹⁰Ó tẹ orí ọ̀run ba pẹ̀lú, ó sì sọ̀kalẹ̀; òkùnkùn biribiri sì ń bẹ ní àtẹ́lẹsẹ̀ rẹ̀.

¹¹Ó sì gun orí kérúbù, ó sì fò: a sì rí i lórí ìyẹ́ afẹ́fẹ́.

¹²Ó sì fi òkùnkùn ṣe ibùjókòó yí ara rẹ̀, àti àgbájọ omi, àní ìsúdudu ìkùukùu àwọ̀n sánmà.

¹³Nípaṣẹ̀ ìmọ́lẹ̀ iwájú rẹ̀ ẹ̀yín-iná ràn.

¹⁴OLÚWA sán ààrá láti ọ̀run wá, ọ̀gá ogo jùlọ sì fọhùn rẹ̀.

¹⁵Ó sì ta ọfà, ó sì tú wọn ká; ó kọ mànàmànà, ó sì ṣẹ́ wọn.

¹⁶Ìṣàn ibú òkun sì fi ara hàn, ìpìlẹ̀ ayé fi ara hàn, nípa ìbáwí OLÚWA, nípa fífún èémí ihò imú rẹ̀.

¹⁶

¹⁷“Ó ránṣẹ́ láti òkè wá, ó mú mi; ó fà mí jáde láti inú omi ńlá wá.

¹⁸Ó gbà mí lọ́wọ́ ọ̀tá mi alágbára, lọ́wọ́ àwọn tí ó kórìíra mi: nítorí pé wọ́n lágbára jù mí lọ.

¹⁹Wọ́n wá láti borí mi lọ́jọ́ ìpọ́njú mi: ṣùgbọ́n OLÚWA ni aláfẹ̀hìntì mi.

²⁰Ó sì mú mi wá sí àyè ńlá: ó gbà mi, nítorí tí inú rẹ̀ dún sí mi.

²⁰

²¹“OLÚWA sán án fún mi gẹ́gẹ́ bí òdodo mi; ó sì san án fún mi gẹ́gẹ́ bí mímọ́ ọwọ́ mi.

²²Nítorí pé èmi pa ọ̀nà OLÚWA mọ́, èmi kò sì fi ìwà búburú yapa kúrò lọ́dọ̀ Ọlọ́run mi.

²³Nítorí pé gbogbo ìdájọ́ rẹ̀ ni ó wà níwájú mi; àti ní ti òfin rẹ̀, èmi kò sì yapa kúrò nínú wọn.

²⁴Èmi sì wà nínú ìwà-títọ́ sí í, èmi sì pa ara mi mọ́ kúrò nínú ẹ̀ṣẹ̀ mi.

²⁵OLÚWA sì san fún mi gẹ́gẹ́ bí òdodo mi, gẹ́gẹ́ bí ìwà-mímọ́ mi níwájú rẹ̀.

²⁵

²⁶“Fún aláàánú ni ìwọ ó fi ara rẹ̀ hàn ni aláàánú, àti fún ẹni-ìdúró-ṣinṣin ní òdodo ni ìwọ ó fi ara rẹ hàn ní ìdúró-ṣinṣin ní òdodo.

²⁷Fún onínú-funfun ni ìwọ fi ara rẹ hàn ní funfun; àti fún ẹni-wíwọ́ ni ìwọ ó fi ara rẹ hàn ní wíwọ́.

²⁸Àwọn ènìyàn tí ó wà nínú ìyà ni ìwọ ó sì gbàlà; ṣùgbọ́n ojú rẹ wà lára àwọn agbéraga, láti rẹ̀ wọ́n sílẹ̀.

²⁹Nítorí ìwọ ni ìmọ́lẹ̀ mi, OLÚWA; OLÚWA yóò sì sọ òkùnkùn mi di ìmọ́lẹ̀.

³⁰Bẹ́ẹ̀ ni nítorí nípa rẹ̀ ni èmi ti la àárin ogun kọjá; nípa Ọlọ́run mi èmi ti fo odi kan.

³⁰

³¹“Ọlọ́run yìí, pípé ni ọ̀nà rẹ̀; ọ̀rọ̀ OLÚWA ni a ti dán wò. Òun sì ni aṣà fún gbogbo àwọn tí ó gbẹ́kẹ̀lé e.

³²Nítorí ta ni Ọlọ́run, bí kò ṣe OLÚWA? Ta ni àpáta, bí kò ṣe Ọlọ́run wa.

³³Ọlọ́run alágbára ni ó fún mi ní agbára, ó sì sọ ọ̀nà mi di títọ́.

³⁴Ó ṣe ẹsẹ̀ mi bí ẹṣẹ̀ àgbọ̀nrín; ó sì mú mi dúró ní ibi gígá mi.

³⁵Ó kọ́ ọwọ́ mi ní ogun jíjà; tóbẹ́ẹ̀ tí apá mi fa ọrun idẹ.

³⁶Ìwọ sì ti fún mi ní àsà ìgbàlà rẹ̀, ìrẹ̀lẹ̀ rẹ̀ sì ti sọ mí di ńlá.

³⁷Ìwọ sì fi àyè ńlá sí abẹ́ ìṣísẹ̀ mi; tóbẹ́ẹ̀ tí ẹsẹ̀ mi kò fi yọ̀.

³⁷

³⁸“Èmi ti lépa àwọn ọ̀tá mi, èmi sì ti run wọ́n, èmi kò pẹ̀yìndà títí èmi fi run wọ́n.

³⁹Èmi ti pa wọ́n run, èmi sì ti fọ́ wọn, wọn kò sì le dìde mọ́: wọ́n ṣubú lábẹ́ mi.

⁴⁰Ìwọ sì ti fi agbára dì mí ní àmùrè fún ìjà; àwọn tí ó ti dìde sí mi ni ìwọ sì ti tẹ̀ lórí ba fún mi.

⁴¹Ìwọ sì mú àwọn ọ̀ta mi pẹ̀yìndà fún mi, èmi ó sì pa àwọn tí ó kórira mi run.

⁴²Wọ́n wò, ṣùgbọ́n kò sí ẹnìkan láti gbà wọ́n; wọ́n wo OLÚWA, ṣùgbọ́n kò dá àwọn lóhùn.

⁴³Nígbà náà ni èmi sì gún wọn wẹ́wẹ́ bí erùpẹ̀ ilẹ̀, èmi sì tẹ̀ wọ́n mọ́lẹ̀ bí ẹrẹ̀ ìta, èmi sì tẹ́ wọn gbọrọ.

⁴³

⁴⁴“Ìwọ sì gbà mí kúrò lọ́wọ́ ìjà àwọn ènìyàn mi, ìwọ pá mí mọ́ ki èmi lè ṣe olórí àwọn àjèjì orílẹ̀-èdè. Àwọn ènìyàn tí èmi kòì tí mọ̀ yóò máa sìn mí.

⁴⁵Àwọn àlejò wá láti tẹríba fún mi; bí wọ́n bá ti gbúròó mi, wọn á sì gbọ́ tèmi.

⁴⁶Àyà yóò pá àwọn àlejò, wọn ó sì fi ìbẹ̀rù sá kúrò níbi kọ́lọ́fín wọn.

⁴⁶

⁴⁷“OLÚWA ń bẹ́; olùbùkún sì ni àpáta mi! Gbígbéga sì ni Ọlọ́run àpáta ìgbàlà mi.

⁴⁸Ọlọ́run ni ẹni tí ń gbẹ̀san mi, àti ẹni tí ń rẹ àwọn ènìyàn sílẹ̀ lábẹ́ mi.

⁴⁹Àti ẹni tí ó gbà mí kúrò lọ́wọ́ àwọn ọ̀ta mi. Ìwọ sì gbé mi sókè ju àwọn tí ó dìde sí mi lọ; ìwọ sì gbà mí kúrò lọ́wọ́ àwọn ọkùnrin oníwà ipá.

⁵⁰ⓑ Nítorí náà èmi ó fi ọpẹ́ fún ọ, OLÚWA, láàrin àwọn àjèjì orílẹ̀-èdè: èmi ó sì kọrin sí orúkọ rẹ.

⁵¹Òun ni ilé-ìṣọ́ ìgbàlà fún ọba rẹ̀; ó sì fi àánú hàn fún ẹni-àmì-òróró rẹ̀, fún Dáfídì, àti fún irú-ọmọ rẹ̀ títí láéláé.”