Ìwé Wòlíì Àìsáyà 13:1-22 BYB2014 - Bible AI

¹ⓐ Ọ̀rọ̀ ìmọ̀ tí ó kan Bábílónì èyí tí Àìṣáyà ọmọ Ámọ́sì rí:

²Gbé àṣíá ṣókè ní orí òkè gbẹrẹfu, kígbe sí wọn, pè wọ́n láti wọlé sí ẹnu ọ̀nà àwọn Bọ̀rọ̀kìnní.

³Mo ti pàṣẹ fún àwọn ẹni mímọ́ mi, mo ti pe àwọn jagunjagun mi láti gbé ìbínú mi jáde àwọn tí ń yọ̀ nínú ìṣẹ́gun mi.

³

⁴Gbọ́ ohùn kan ní àwọn orí òkè, gẹ́gẹ́ bí i ti ogunlọ́gọ̀ ènìyàn Gbọ́, ìdàrúdàpọ̀ láàrin àwọn ìjọba, gẹ́gẹ́ bí i ti ìkórajọ àwọn orílẹ̀ èdè! OLÚWA àwọn ọmọ-ogun ti kó ogun rẹ̀ jọ àwọn jagunjagun fún ogun.

⁵Wọ́n wá láti ọ̀nà jínjìn réré, láti ìpẹ̀kun ọ̀run wá OLÚWA pẹ̀lú àwọn ohun ìjà ìbínú un rẹ̀— láti pa gbogbo orílẹ̀ èdè náà run.

⁵

⁶Pohùnréré, nítorí ọjọ́ OLÚWA súnmọ́tòsí, yóò sì wá gẹ́gẹ́ bí ìparun láti ọ̀dọ̀ Alágbára jùlọ.

⁷Nítorí èyí, gbogbo ọwọ́ ni yóò rọ, ọkàn ẹnìkọ̀ọ̀kan yóò rẹ̀wẹ̀sì.

⁸Ẹ̀rù yóò gbá wọn mú, ìrora àti ìpayínkeke yóò dì wọ́n mú, wọn yóò kérora gẹ́gẹ́ bí obìnrin tí ó ń rọbí. Ẹnìkín-ín-ní yóò wo ẹnìkejìi rẹ̀ pẹ̀lú ìpayà ojú wọn á sìgbinájẹ.

⁸

⁹Kíyèsí i, ọjọ́ OLÚWA ń bọ̀ ọjọ́ búburú, pẹ̀lú ìbínú àti ìrunú gbígbóná— láti sọ ilẹ̀ náà dahoro àti láti pa àwọn ẹlẹ́ṣẹ̀ inú un rẹ̀ run.

¹⁰ⓑ Àwọn ìràwọ̀ ojú ọ̀run ati ìkójọpọ̀ wọn kò sì ní fi ìmọ́lẹ̀ wọn hàn. Àṣẹ̀ṣẹ̀yọ òòrùn yóò di òkùnkùn àti òṣùpá kò ní fi ìmọ́lẹ̀ rẹ̀ hàn.

¹¹Èmi yóò jẹ ayé ní ìyà nítorí ibi rẹ̀, àwọn ìkà nítorí ẹ̀ṣẹ̀ẹ wọn. Èmi yóò fi òpin sí gààrù àwọn agbéraga èmi ó sì rẹ ìgbéraga àwọn aláìláàánú sílẹ̀.

¹²Èmi yóò jẹ́ kí ọkùnrin kí ó wọn ju ojúlówóo wúrà lọ, yóò sì ṣọ̀wọ́n ju wúrà ófírì lọ.

¹³Nítorí náà èmi yóò jẹ́ kí àwọn ọ̀run kí ó wárìrì; ayé yóò sì mì tìtì ní ibùjókòó rẹ̀ láti ọwọ́ ìbínú OLÚWA àwọn ọmọ-ogun, ní ọjọ́ ìbínú gbígbóná an rẹ.

¹³

¹⁴Gẹ́gẹ́ bí èkùlù tí à ń dọdẹ rẹ̀, gẹ́gẹ́ bí àgùntàn tí kò ní olùṣọ́, ọ̀kọ̀ọ̀kan yóò padà tọ àwọn ènìyàn rẹ̀ lọ, ọ̀kọ̀ọ̀kan yóò sá padà sí ilẹ̀ abínibí i rẹ̀.

¹⁵Ẹnikẹ́ni tí a bá gbámú ni a ó wọ́ nílẹ̀ tuurutu, gbogbo àwọn tí ọwọ́ bá tẹ̀ ni yóò ti ipa idà kú.

¹⁶Àwọn mọ̀jèsín wọn ni a ó fọ́ sí wẹ́wẹ́ níṣojú wọn, gbogbo ilẹ̀ wọn ni a ó kó àwọn aya wọn ni a ó sì bá dàpọ̀.

¹⁶

¹⁷Kíyèsí i, èmi yóò ru àwọn Mẹ́dísì sókè sí wọn, àwọn tí kò bìkítà fún fàdákà tí kò sì ní inú dídùn sí wúrà.

¹⁸Ọrùn wọn yóò ré àwọn ọ̀dọ́mọkùnrin lulẹ̀; wọn kò ní ṣàánú àwọn mọ̀jèsín tàbí kí wọn síjú àánú wo àwọn ọmọdé.

¹⁹Bábílónì, ohun ọ̀ṣọ́ àwọn ìjọba ògo ìgbéraga àwọn ará Bábílónì ni Ọlọ́run yóò dojúrẹ̀ bolẹ̀ gẹ́gẹ́ bí Sódómù àti Gòmórà.

²⁰A kì yóò sì gbé ibẹ̀ mọ́ tàbí kí á gbé inú rẹ̀ láti ìrandíran; Árábù kan yóò fi àgọ́ rẹ lélẹ̀ níbẹ̀, Olùsọ́ àgùntàn kan kì yóò kó ẹran rẹ̀ sinmi níbẹ̀.

²¹ⓒ Ṣùgbọ́n àwọn ohun abẹ̀mí aṣálẹ̀ ni yóò gbé bẹ̀, àwọn ajáko yóò kún inú ilé wọn, níbẹ̀ ni àwọn òwììwí yóò máa gbé níbẹ̀ ni àwọn ewúrẹ́-igbó yóò ti máa bẹ́ kiri.

²²Ìkookò yóò máa gbó ní ibùba wọn, àwọn ajáko nínú arẹwà ààfin wọn.