Ìwé Wòlíì Àìsáyà 23:1-18 BYB2014 - Bible AI

¹ⓐ Ọ̀rọ̀ ìmọ̀ tí ó kan Tírè: Pohùnréré, ìwọ ọkọ̀-ojú omi Táṣíṣì! Nítorí a ti pa Tírè run láìsí ilé tàbí èbúté. Láti ilẹ̀ Ṣáípúrọ́sì ni ọ̀rọ̀ ti wá sọ́dọ̀ wọn.

²Dákẹ́ jẹ́ẹ́, ẹ̀yin ènìyàn erékùṣù àti ẹ̀yin oníṣòwò ti Sídónì, ẹ̀yin tí àwọn awẹ̀kun ti sọ dọlọ́rọ̀.

³Láti orí àwọn omi ńlá ni irúgbìn oníhóró ti ilẹ̀ Ṣíhórì ti wá ìkóórè ti Náì ni owóòná Tírè, òun sì ti di ibùjókòó ọjà fún àwọn orílẹ̀ èdè.

³

⁴Kí ojú kí ó tì ọ́, ìwọ Ṣídónì àti ìwọ àní ìwọ ilé-ààbò ti òkun, nítorí òkun ti sọ̀rọ̀: “Èmi kò tí ì wà ní ipò ìrọbí tàbí ìbímọ rí Èmi kò tí ì wọ àwọn ọmọkùnrin tàbí kí n tọ́ àwọn ọmọbìnrin dàgbà rí.”

⁵Nígbà tí ọ̀rọ̀ bá dé Éjíbítì, wọn yóò wà ní ìpayínkeke nípa ìròyìn láti Tírè.

⁵

⁶Kọjá wá sí Táṣíṣì; pohùnréré, ẹ̀yin ènìyàn erékùṣù.

⁷Ǹjẹ́ èyí náà ni ìlú àríyáa yín, ògbólógbòò ìlú náà, èyí tí ẹṣẹ̀ rẹ̀ ti sìn ín lọ láti lọ tẹ̀dó sí ilẹ̀ tí ó jìnnà réré.

⁸Ta ló gbérò èyí sí Tírè, ìlú aládé, àwọn oníṣòwò ẹni tí ó jẹ́ ọmọ aládé tí àwọn oníṣòwò o wọ́n jẹ́ ìlúmọ̀míká ní orílẹ̀ ayé?

⁹OLÚWA àwọn ọmọ-ogun ti ṣètò rẹ̀, láti tẹrí ìgbéraga àti ògo rẹ ba àti láti rẹ gbogbo àwọn ọlọ́lá ilé ayé sílẹ̀.

⁹

¹⁰Tu ilẹ̀ rẹ gẹ́gẹ́ bí i ti ipadò Náì, Ìwọ ọmọbìnrin Táṣíṣì, nítorí ìwọ kò ní èbúté mọ́.

¹¹OLÚWA ti na ọwọ́ọ rẹ̀ jáde sí orí òkun ó sì mú kí àwọn ilẹ̀ ọba wárìrì. Ó ti pa àṣẹ kan tí ó kan Fonísíà pé kí a pa ilé ààbò rẹ̀ run.

¹²Ó wí pé, “Kò sí àríyá fún ọ mọ́” ìwọ wúndíá ti Ṣídónì, tí a ti tẹ̀rẹ́ báyìí!

¹²“Gbéra, rékọjá lọ sí Ṣáípúrọ́sì, níbẹ̀ pẹ̀lú o kì yóò ní ìsinmi.”

¹³Bojú wo ilẹ̀ àwọn ará Bábílónì, àwọn ènìyàn tíkò jámọ́ nǹkankan bàyìí Àwọn Ásíríà ti sọ ọ́ di ibùgbé àwọn ohun abẹ̀mí ihà; wọn ti gbé ilé ìṣọ́ ìtẹ̀gun wọn ṣókè, wọ́n ti tú odi rẹ̀ sí ìhòòhò wọ́n sì ti sọ ọ́ di ààtàn.

¹³

¹⁴Pohùnréré, ìwọ ọkọ̀ ojú omi Táṣíṣì; wọ́n ti pa odi rẹ̀ run!

¹⁵Ní àkókò náà a ó gbàgbé Tírè fún àádọ́rin ọdún, ọjọ́ ayé ọba kan. Ṣùgbọ́n ní òpin àádọ́rin ọdún wọ̀nyí, yóò ṣẹlẹ̀ sí Tírè gẹ́gẹ́ bí orin àgbèrè:

¹⁶“Mú hápù kan, rìn kọjá láàrin ìlú, Ìwọ àgbèrè tí a ti gbàgbé; lu hápù rẹ dáadáa, kọ ọ̀pọ̀ orin, kí a lè ba à rántíi rẹ.”

¹⁷ⓑ Ní òpin àádọ́rin ọdún náà, OLÚWA yóò bá Tírè jà. Òun yóò sì padà sí àyálò rẹ̀ gẹ́gẹ́ bí aṣẹ́wó, yóò sì máa ṣe òwò rẹ̀ pẹ̀lú àwọn ilẹ̀ ọba tí ó wà ní ilẹ̀ ayé.

¹⁸Ṣíbẹ̀ ṣíbẹ̀ èree rẹ̀ àti owó iṣẹ́ẹ rẹ̀ ni a ó yà ṣọ́tọ̀ fún OLÚWA; a kò ní kó wọn pamọ́ tàbí kí a há wọn mọ́wọ́. Ère rẹ̀ ni a ó fi fún àwọn tí ó ń gbé níwájú OLÚWA, fún ọ̀pọ̀lọpọ̀ oúnjẹ àti aṣọ.