Ìwé Wòlíì Àìsáyà 24:1-23 BYB2014 - Bible AI

¹Kíyèsí i, OLÚWA yóò sọ ohun gbogbo dòfo ní ilẹ̀ ayé yóò sì pa á run òun yóò pa ojúu rẹ̀ rẹ́ yóò sì fọ́n àwọn olùgbé ibẹ̀ káàkiri—

²bákan náà ni yóò sì rí fún àlùfáà àti àwọn ènìyàn, fún ọ̀gá àti ọmọ ọ̀dọ̀, fún ìya-ilé àti ọmọbìnrin, fún olùtà àti olùrà, fún ayáni àti atọrọ fún ayánilówó àti onígbésè.

³Ilé ayé ni a ó sọ di ahoro pátapáta a ó sì jẹ gbogbo rẹ̀ run. OLÚWA ni ó ti sọ ọ̀rọ̀ yìí.

³

⁴Ilẹ̀ ayé ti gbẹ ó sì ṣá, ayé ń ṣòjòjò, àárẹ̀ mú un, àwọn ẹni gíga ilẹ̀ ayé wà nínú ìpọ́njú

⁵àwọn ènìyàn ayé ti bà á jẹ́; wọ́n ti pa àwọn òfin run wọ́n ṣe lòdì sí àwọn ìlànà wọ́n sì ti ba májẹ̀mú ayérayé jẹ́.

⁶Nítorí náà, ègún kan ti jẹ ayé run; àwọn ènìyàn rẹ̀ ní láti ru ẹ̀bi wọn. Nítorí náà, àwọn olùgbé ayé ti gbiná dànù, àwọn ẹ̀tàhóró ló sì kù.

⁷Wáìnì tuntun ti gbẹ, àjàrà sì ti rọ, gbogbo àwọn alárìíyá sì kérora.

⁸ⓐ Àríyá ti tamborínì ti dákẹ́ ariwo àwọn tí ń ṣàjọyọ̀ ti dáwọ́ dúró ayọ̀ hápù ti dákẹ́ jẹ́ẹ́.

⁹Kò ṣeéṣe fún wọn láti máa mu wáìnì pẹ̀lú orin kíkọ mọ́ ọtí líle ti di ìkorò fún àwọn ọ̀mu.

¹⁰Ìlú tí a run ti dahoro, ẹnu ọ̀nà à bá wọlé kọ̀ọ̀kan ni a dí pa.

¹¹Ní òpópónà ni wọ́n ti ń kígbe fún wáìnì gbogbo ayọ̀ọ wọn ti di ìbànújẹ́, gbogbo àríyá ni a lé kúrò lórí ilẹ̀ ayé.

¹²Ìlú ni a ti fi sílẹ̀ ní ahoro, ìlẹ̀kùn rẹ̀ ni a sì ti pa bámú bámú.

¹³Bẹ́ẹ̀ ni yóò sì rí ní orí ilẹ̀ ayé àti láàrin àwọn orílẹ̀ èdè pẹ̀lú, gẹ́gẹ́ bí ìgbà tí a lu igi ólífì, tàbí gẹ́gẹ́ bí i pàǹtí tí ó ṣẹ́kù lẹ́yìn tí a kórè èso tán.

¹³

¹⁴Wọ́n gbé ohùn wọn ṣókè, wọ́n sì hó fún ayọ̀; láti ìwọ̀ oòrùn ni wọn yóò ti polongo ọlá-ńlá OLÚWA.

¹⁵Nítorí náà ní ìlà oòrùn ẹ fi ògo fún OLÚWA; gbé orúkọ OLÚWA ga, àní Ọlọ́run Ísírẹ́lì, ní àwọn erékùṣù ti inú òkun,

¹⁶Láti òpin ayé wá ni a ti gbọ́ orin; “Ògo ni fún olódodo n nì.” Ṣùgbọ́n mo wí pé, “mo ṣègbé, mo ṣègbé!”

¹⁶“Ègbé ni fún mi! Alárékérekè dalẹ̀! Pẹ̀lú ìhàlẹ̀ ni àgàbàgebè fi dalẹ̀!”

¹⁷Ìpáyà, isà-òkú, àti ìdẹkùn ń dúró dè ọ́, Ìwọ ènìyàn ilẹ̀ ayé.

¹⁸Ẹnikẹ́ni tí ó bá sá nítorí ariwo ìpayà yóò ṣubú sínú ihò, ẹnikẹ́ni tí ó bá sì yọ́ jáde nínú ihò ni ìdẹkùn yóò gbámú.

¹⁸Ibodè ọ̀run ti wà ní sísí sílẹ̀ Ìpìlẹ̀ ayé mì tìtì.

¹⁹Ilẹ̀ ayé ti fọ́ ilẹ̀ ayé ti fọ́ dànù, a ti mi ilẹ̀ ayé rìrìrìrì.

¹⁹

²⁰Ilẹ̀ ayé yí gbiri bí ọ̀mùtí, ó bì síwá ṣẹ́yìn bí ahéré nínú afẹ́fẹ́; Ẹ̀bi ìṣọ̀tẹ̀ rẹ̀ ń pa á lẹ́rù tó bẹ́ẹ̀ tí ó fi ṣubú láìní lè dìde mọ́.

²¹Ní ọjọ́ náà ni OLÚWA yóò jẹ ẹ́ níyà gbogbo agbára tí ó wà lókè lọ́run àti àwọn ọba tí ó wà lórí ilẹ̀ ayé.

²²A ó dà wọ́n papọ̀ gẹ́gẹ́ bí ẹlẹ́wọ̀n tí a dè nínú un túbú, a ó tì wọ́n mọ́ inú ẹ̀wọ̀n a ó sì jẹ wọ́n ní ìyà lẹ́yìn ọ̀pọ̀lọpọ̀ ọjọ́.

²³A ó rẹ òṣùpá sílẹ̀, ojú yóò sì ti òòrùn; nítorí OLÚWA àwọn ọmọ-ogun yóò jọba ní orí òkè Ṣíhónì àti ní Jérúsálẹ́mù, àti níwájú àwọn alàgbà rẹ ní ògo.