Ìwé Wòlíì Àìsáyà 25:1-12 BYB2014 - Bible AI

¹OLÚWA, ìwọ ni Ọlọ́run un mi; Èmi yóò gbé ọ ga èmi ó sì fi ìyìn fún orúkọọ̀ rẹ nítorí nínú òtítọ́ aláìlẹ́gbẹ́ o ti ṣe ohun ńlá, àwọn ohun tí o ti gbèròo rẹ̀ lọ́jọ́ pípẹ́.

²Ìwọ ti sọ ìlú di àkójọ àlàpà, ìlú olódi ti di ààtàn, ìlú olódi fún àwọn àjèjì ni kò sí mọ́; a kì yóò tún un kọ́ mọ́.

³Nítorí náà àwọn ènìyàn alágbára yóò bọ̀wọ̀ fún ọ; àwọn ìlú orílẹ̀ èdè aláìláàánú yóò bọlá fún ọ.

⁴Ìwọ ti jẹ́ ààbò fún àwọn òtòsì ààbò fún aláìní nínú ìpọ́njúu rẹ̀ ààbò kúrò lọ́wọ́ ìjì bòòji kúrò lọ́wọ́ ooru. Nítorí pé èémí àwọn ìkà dàbí ìjì tí ó bì lu ògiri

⁵àti gẹ́gẹ́ bí ooru ní ihà. O mú ìdákẹ́ jẹ́ẹ́ bá rògbòdìyàn àwọn àjèjì, gẹ́gẹ́ bí òjìji kùrukùru ṣe ń dín ooru kù, bẹ́ẹ̀ gẹ́gẹ́ ni orin àwọn ìkà yóò dákẹ́.

⁵

⁶Ní ori òkè yìí ni OLÚWA àwọn ọmọ-ogun yóò ti pèṣè àṣè oúnjẹ àdídùn kan fún gbogbo ènìyàn àpèjẹ ti wáìnì àtijọ́ ti ẹran tí ó dára jù àti ti wáìnì tí ó gbámúṣé.

⁷Ní orí òkè yìí ni yóò parun aṣọ òkú tí ó ti ń di gbogbo ènìyàn, abala tí ó bo gbogbo orílẹ̀ èdè mọ́lẹ̀;

⁸ⓐ Òun yóò sì gbé ikú mì títí láé. OLÚWA gbogbo ayé yóò sì nu gbogbo omijé nù, kúrò ní ojúu gbogbo wọn; Òun yóò sì mú ẹ̀gàn àwọn ènìyàn an rẹ̀ kúrò ní gbogbo ilẹ̀ ayé. OLÚWA ni ó ti sọ ọ́.

⁹Ní ọjọ́ náà wọn yóò sọ pé, “Nítòótọ́ eléyìí ni Ọlọ́run wa; àwa ní ìgbẹ́kẹ̀lé nínú un rẹ̀, òun sì gbà wá là. Èyí ni OLÚWA, àwa gbẹ́kẹ̀lé e, ẹ jẹ́ kí a yọ̀ kí inú un wa sì dùn nínú ìgbàlà rẹ̀.”

¹⁰ⓑ Ọwọ́ OLÚWA yóò sinmi lé orí òkè yìí ṣùgbọ́n a ó tẹ Móábù mọ́lẹ̀ lábẹ́ ẹṣẹ̀ rẹ̀; gẹ́gẹ́ bí a ti gún koríko mọ́lẹ̀ di ajílẹ̀.

¹¹Wọn yóò na ọwọ́ọ wọn jáde nínú un rẹ̀, gẹ́gẹ́ bí òmùwẹ̀ tí ń na ọwọ́ọ rẹ̀ jáde láti lúwẹ̀ẹ́. Ọlọ́run yóò mú ìgbéraga wọn wálẹ̀ bó tilẹ̀ jẹ́ pé ìṣeféfé wà ọwọ́ ọ wọn.

¹²Òun yóò sì bi gbogbo ògiri gíga alágbára yín lulẹ̀ wọn yóò sì wà nílẹ̀ Òun yóò sì mú wọn wá si ilẹ̀, àní sí erùpẹ̀ lásán.