Ìwé Wòlíì Àìsáyà 26:1-21 BYB2014 - Bible AI

¹Ní ọjọ́ náà ni a ó kọ orin yìí ní ilẹ̀ Júdà: Àwa ní ìlú alágbára kan, Ọlọ́run fi ìgbàlà ṣe ògiri àti ààbò rẹ̀.

²Ṣí àwọn ìlẹ̀kùn kí àwọn olódodo orílẹ̀ èdè kí ó lè wọlé, orílẹ̀ èdè tí ó pa ìgbàgbọ́ mọ́.

³Ìwọ yóò paámọ́ ní àlàáfíà pípé ọkàn ẹni tí ó dúró ṣinṣin, nítorí ó gbẹ́kẹ̀lé ọ.

⁴Gbẹ́kẹ̀lé OLÚWA títí láé, nítorí OLÚWA, OLÚWA ni àpáta ayérayé náà.

⁵Ó sọ àwọn tí ó ń gbé ní òkè di onírẹ̀lẹ̀ ó rẹ ìlú agbéraga náà nílẹ̀; ó sọ ọ́ di ilẹ̀ pẹrẹṣẹ ó sì sọ ọ́ sílẹ̀ nínú erùpẹ̀.

⁶Ẹṣẹ̀ tẹ̀ ẹ́ mọ́lẹ̀ ẹṣẹ̀ aninilára n nì, ipaṣẹ̀ àwọn òtòsì.

⁶

⁷Ipa ọ̀nà àwọn olódodo tẹ́jú Ìwọ adúró ṣinṣin, ìwọ mú ọ̀nà àwọn olódodo kúnná.

⁸Bẹ́ẹ̀ ni, OLÚWA, rírìn ní ọ̀nà òfin rẹ àwa dúró dè ọ́; orúkọọ rẹ àti òkìkíì rẹ àwọn ni ohun tí ọkàn wa ń fẹ́.

⁹Ọkàn mi ń pòùngbẹẹ̀ rẹ ní ọ̀gànjọ́ òru; ní òwúrọ̀ ni ẹ̀mí mi ń ṣàfẹ́rí rẹ. Nígbà tí ìdájọ́ọ̀ rẹ bá sọ̀kalẹ̀ sórí ayé àwọn ènìyàn yóò kọ́ ìṣòdodo.

¹⁰Bí ó tilẹ̀ jẹ́ pé a fi oore-ọ̀fẹ́ hàn sí àwọn ìkà wọn kò kọ́ láti ṣòdodo; kódà ní ilẹ̀ àwọn tí ó dúró ṣinṣin wọ́n tẹ̀ṣíwájú láti máa ṣe ibi wọn kò sì ka ọlá ńlá OLÚWA sí.

¹¹OLÚWA, ti gbé ọwọ́ọ rẹ̀ sókè ṣùgbọ́n àwọn kò rí i. Jẹ́ kí wọ́n rí ìtara rẹ fún àwọn ènìyàn rẹ kí ojú kí ó tì wọ́n; jẹ́ kí iná tí a fi pamọ́ fún àwọn ọ̀ta rẹ jó wọn run.

¹¹

¹²OLÚWA, ìwọ fi àlàáfíà lélẹ̀ fún wa; ohun gbogbo tí a ti ṣe yọrí ìwọ ni ó ṣe é fún wa.

¹³OLÚWA Ọlọ́run wa, àwọn olúwa mìíràn lẹ́yìn rẹ ti jọba lé wa lórí, ṣùgbọ́n orúkọọ̀ rẹ nìkan ni àwa fi ọ̀wọ̀ fún.

¹⁴Wọ́n ti kú báyìí, wọn ò sí láàyè mọ́; gbogbo ẹ̀mí tí ó ti kọjá lọ wọ̀nyí kò le dìde mọ́. Ìwọ jẹ́ wọ́n ní ìyà o sì sọ wọ́n di asán, Ìwọ pa gbogbo ìrántíi wọn rẹ́ pátapáta.

¹⁵Ìwọ ti mú orílẹ̀ èdè gbòòrò, OLÚWA; ìwọ ti mú orílẹ̀ èdè bí sí i. Ìwọ ti gba ògo fún araàrẹ; ìwọ ti sún gbogbo àwọn ààlà ilẹ̀ ṣẹ́yìn.

¹⁵

¹⁶OLÚWA, Wọ́n wá sọ́dọ̀ rẹ nínú ìpọ́njúu wọn; nígbà tí o jẹwọ́n ní ìyà, wọ́n tilẹ̀ fẹ́ ẹ̀ má le gbàdúrà kẹ́lẹ́ kẹ́lẹ́.

¹⁷Gẹ́gẹ́ bí obìnrin tí ó lóyún tí ó sì fẹ́rẹ bímọ tí í rúnra tí ó sì ń sunkún nínú ìrora rẹ̀, bẹ́ẹ̀ gẹ́gẹ́ ni àwa rí níwájúu rẹ OLÚWA.

¹⁸Àwa wà nínú oyún, a wà nínú ìrora ṣùgbọ́n, afẹ́fẹ́ ni a bí lọ́mọ. Àwa kò mú ìgbàlà wá sí ilẹ̀ ayé; àwa kọ́ ni a bí àwọn ènìyàn tí ó wà láyé.

¹⁸

¹⁹Ṣùgbọ́n àwọn òkúu yín yóò wà láàyè ara wọn yóò dìde. Ìwọ tí o wà nínú erùpẹ̀, dìde nílẹ̀ kí o sì ké igbe ayọ̀. Ìrì rẹ dàbí ìrì òwúrọ̀, ayé yóò bí àwọn òkúu rẹ̀ lọ́mọ.

¹⁹

²⁰Ẹ lọ, ẹ̀yin ènìyàn mi, ẹ wọ ìyẹ̀wùu yín lọ kí ẹ sì ti àwọn ìlẹ̀kùn lẹ́yìn in yín, ẹ fi ara yín pamọ́ fún ìgbà díẹ̀ títí tí ìbínú un rẹ̀ yóò fi rékọjá.

²¹Kíyèsíì, OLÚWA ń jáde bọ̀ láti ibùgbé e rẹ̀ láti jẹ àwọn ènìyàn ilẹ̀ ayé ní ìyà fún ẹ̀ṣẹ̀ẹ wọn. Ayé yóò sì sọ àwọn ẹ̀jẹ̀ tí a ta sí oríi rẹ̀, kì yóò sì fi àwọn tí a ti pa pamọ́ mọ́.