Ìwé Wòlíì Àìsáyà 32:1-20 BYB2014 - Bible AI

¹Wòó, ọba kan yóò jẹ nínú òdodo àwọn olórí yóò máa ṣàkóso ní ìdájọ́.

²Ẹnì kọ̀ọ̀kan yóò dàbí ìdáàbòbò lọ́wọ́ afẹ́fẹ́ àti ààbò kúrò lọ́wọ́ ìjì, gẹ́gẹ́ bí odò omi nínú aṣálẹ̀ àti òjìji àpáta ńlá ní ilẹ̀ òrùngbẹ.

²

³Nígbà náà ni ojú àwọn tí ó rí kò ní pàdé mọ́, àti etí àwọn tí ó gbọ́ yóò tẹ́tí sílẹ̀.

⁴Ọkàn àwọn oníwàdùwàdù ni yóò là tí yóò sì yè, àti ahọ́n tí ń kólòlò ni yóò là geerege.

⁵A kò ní pe òmùgọ̀ ní bọ̀rọ̀kìnní mọ́ tàbí kí a fi ọ̀wọ̀ tí ó ga jù fún mọ̀dàrú.

⁶Nítorí òmùgọ̀ ṣọ̀rọ̀ òmùgọ̀, ọkàn rẹ̀ kún fún ìwà ibi: òun hùwà àìwà-bí-Ọlọ́run ó sì ń tan àṣìṣe tí ó kan OLÚWA kalẹ̀; ẹni ebi ń pa ló fi sílẹ̀ lófo àti fún àwọn tí òrùngbẹ ń gbẹ ni ó mú omi kúrò.

⁷Ìlànà àwọn aṣa jẹ ti ìkà, ó pète oríṣìí ìlànà ibi láti pa aláìní run pẹ̀lú irọ́ bí ó tilẹ̀ jẹ́ pé ẹ̀bẹ̀ òtòsì sì tọ̀nà.

⁸Ṣùgbọ́n bọ̀rọ̀kìnní ènìyàn a máa pète ohun ńlá àti nípa èrò rere ni yóò dúró.

⁹Ẹ̀yin obìnrin tí ẹ ti gba ìtẹ́lọ́rùn gidi ẹ dìde kí ẹ tẹ́tí sí mi, ẹ̀yin ọ̀dọ́mọbìnrin tí ọkàn yín ti balẹ̀, ẹ gbọ́ ohun tí mo fẹ́ sọ!

¹⁰Ní ó lé díẹ̀ ní ọdún kan ẹ̀yin tí ọkàn an yín balẹ̀ yóò wárìrì; ìkóórè àjàrà kò ní múnádóko, bẹ́ẹ̀ ni ìkóórè èṣo kò ní sí.

¹¹Wárìrì, ẹ̀yin obìnrin onítẹ̀lọ́rùn bẹ̀rù, ẹ̀yin ọ̀dọ́mọbìnrin tí ẹ rò pé ọkàn yín balẹ̀! Ẹ bọ́ aṣọ yín kúrò, ẹ ró aṣọ ọ̀fọ̀ mọ́ ẹ̀gbẹ́ẹ yín.

¹²Ẹ lu ọmú un yín fún pápá ìgbádùn náà, fún àwọn àjàrà eléso

¹³àti fún ilẹ̀ àwọn ènìyàn mi ilẹ̀ tí ó ti kún fún ẹ̀gún àti ẹ̀wọ̀n— bẹ́ẹ̀ ni, kẹ́dùn fún gbogbo ilé ìtura àti fún ìlú àríyá yìí.

¹⁴Ilé olódi ni a ó kọ̀ sílẹ̀, ìlù aláriwo ni a ó kọ̀tì; ilé olódi àti ilé ìṣọ́ ni yóò di ìdànù títí láéláé, ìdùnnú àwọn kẹ́tẹ́kẹ́tẹ́ àti pápá oko fún àwọn ẹran ọ̀sìn,

¹⁵títí a ó fi tú Ẹ̀mí sí wa lórí láti òkè wá, àti ti aṣálẹ̀ tí yóò dí pápá oko ọlọ́ràá àti tí pápá ọlọ́ràá yóò dàbí ẹgàn.

¹⁶Ẹ̀tọ́ yóò máa gbé ní inú aṣálẹ̀ àti òdodo yóò sì máa gbé ní pápá oko ọlọ́ràá.

¹⁷Èṣo òdodo náà yóò sì jẹ́ àlàáfíà; àbájáde òdodo yóò sì jẹ́ ìdákẹ́jẹ́ àti ìgbẹ́kẹ̀lé títí láé.

¹⁸Àwọn ènìyàn mi yóò máa gbé ní àlàáfíà ní ibùgbé àlàáfíà, ní àwọn ilé ààbò, ní àwọn ibi ìsinmi tí kò ti sí ìdíwọ́.

¹⁹Bí ó tilẹ̀ jẹ́ pé yìnyín ti tẹ́jú igbó pẹrẹṣẹ àti tí ojú ìlú ti tẹ́ pẹrẹṣẹ pátapáta,

²⁰báwo ni ẹ ó ti jẹ́ alábùkún tó, nípa gbíngbin irúgbìn sí ipa odò gbogbo, àti nípa jíjẹ́ kí àwọn màlúù yín àti àwọn kẹ́tẹ́kẹ́tẹ́ jẹ láìsí ìdíwọ́.