Ìwé Wòlíì Àìsáyà 4:1-6 BYB2014 - Bible AI

¹Ní ọjọ́ náà, obìnrin méje yóò dì mọ́ ọkunrin kan yóò sì wí pé, “Àwa ó má a jẹ oúnjẹ ara wa a ó sì pèsè aṣọ ara wa; sáà jẹ́ kí a má a fi orúkọ rẹ̀ pè wá. Mú ẹgan wá kúrò!”

²ⓐ Ní ọjọ́ náà, ẹ̀ka OLÚWA yóò ní ẹwà àti ogo, èso ilẹ̀ náà yóò sì jẹ́ ìgbéraga àti ògo àwọn ti ó sálà ní Ísírẹ́lì.

³Àwọn tí ó ṣẹ́kù ní Síhónì, àwọn tí o kù ní Jérúsálẹ́mù, ni a ó pè ní mímọ́, orúkọ àwọn ẹni tí a kọ mọ́ àwọn alààyè ní Jérúsálẹ́mù.

⁴OLÚWA yóò wẹ ẹgbin àwọn obinrin Síhónì kúrò yóò sì fọ gbogbo àbàwọ́n ẹ̀jẹ̀ kúrò ní Jérúsálẹ́mù pẹ̀lú ẹ̀mí ìdájọ́ àti ẹ̀mí ìná.

⁵Lẹ́yìn náà, OLÚWA yóò dá sorí òkè Síhónì àti sóríi gbogbo àwọn tí ó péjọ pọ̀ ṣíbẹ̀, kúrúkúrú èéfín ní ọ̀ṣán àti ìtànsán ọ̀wọ́ iná ní òru, lórí gbogbo ògo yìí ni ààbò yóò wà.

⁶Èyí ni yóò jẹ́ ààbò àti òjìji kúrò lọ́wọ́ ooru ọ̀sán, àti ààbò òun ibi ìsádi kúrò lọ́wọ́ ìjì àti òjò.