Ìwé Wòlíì Àìsáyà 40:1-31 BYB2014 - Bible AI

¹Ẹ tùú nínú, ẹ tu ènìyàn mi nínú, ni Ọlọ́run yín wí.

²Sọ̀rọ̀ pẹ̀lẹ́pẹ̀lẹ́ fún Jérúsálẹ́mù kí o sì kéde fún un pé iṣẹ́ àṣekára rẹ̀ ti parí, pé à ti san gbésè ẹ̀ṣẹ̀ rẹ̀, pé ó ti rí i gbà láti ọwọ́ OLÚWA ìlọ́po méjì fún gbogbo ẹ̀ṣẹ̀ rẹ̀.

²

³ⓐ Ohùn ẹnìkan tí ń pè: “Nínú ihà ẹ pèṣè ọ̀nà sílẹ̀ fún OLÚWA: ṣe é kí ó tọ́ ní ihà òpópónà fún Ọlọ́run wa.

⁴ⓑ Gbogbo àfonífojì ni a ó gbé ṣókè, gbogbo òkè ńlá àti òkè kékeré ni yóò di pẹ̀tẹ́lẹ̀; wíwọ́ ni a ó sọ di títọ́ àti ọ̀nà pálapàla ni a yóò sọ di títẹ́jú pẹrẹṣẹ,

⁵Ògo OLÚWA yóò sì di mímọ̀ gbogbo ọmọnìyàn lápapọ̀ ni yóò sì rii. Nítorí ẹnu OLÚWA ni ó ti sọ ọ́.”

⁵

⁶ⓒ Ohùn kan wí pé, “Kígbe ṣókè.” Èmi sì sọ pé, “Igbe kí ni èmi ó ké?”

⁶“Gbogbo ènìyàn dàbí i koríko, àti gbogbo ògo wọn dàbí ìtànná inú un pápá.

⁷Koríko ń rọ ìtànná sì ń rẹ̀, nítorí èémí OLÚWA ń fẹ́ lù wọ́n. Nítòótọ́ koríko ni àwọn ènìyàn.

⁸Koríko ń rọ ìtànná sì ń rẹ̀, ṣùgbọ́n ọ̀rọ̀ Ọlọ́run wa dúró títí láé.”

⁸

⁹ⓓ Ìwọ tí o mú ìyìn ayọ̀ wá sí Ṣíhónì, lọ sí orí òkè gíga. Ìwọ tí ó mú ìyìn ayọ̀ wá sí Jérúsálẹ́mù, gbé ohùn rẹ ṣókè pẹ̀lú ariwo, gbé e sókè, má ṣe bẹ̀rù; sọ fún àwọn ìlúu Júdà, “Ọlọ́run rẹ nìyìí!”

¹⁰ⓔ Wò ó, OLÚWA àwọn ọmọ-ogun náà ń bọ̀ wá pẹ̀lú agbára, apá rẹ̀ sì ń jọba fún un. Wò ó, ère rẹ̀ sì wà pẹ̀lúu rẹ̀, àti ìdápadà rẹ̀ tí ń bá a bọ̀ wá.

¹¹Ó ń tọ́ àwọn agbo rẹ̀ gẹ́gẹ́ bí olùṣọ́-àgùntàn: Ó kó àwọn ọ̀dọ́-àgùntàn ní apá rẹ̀. Ó sì gbé wọn súnmọ́ oókan-àyàa rẹ̀; ó sì fi pẹ̀lẹ́pẹ̀lẹ́ da rí àwọn tí ó ní ọ̀dọ́.

¹¹

¹²Ta ni ó ti wọn omi nínú kòtò ọwọ́ rẹ̀, tàbí pẹ̀lú ìbú ọwọ́ rẹ̀ tí ó wọn àwọn ọ̀run? Ta ni ó ti kó erùpẹ̀ ilẹ̀-ayé jọ nínú apẹ̀rẹ̀, tàbí kí ó wọn àwọn òkè ńlá lórí ìwọ̀n àti òkè kéékèèkéé nínú òṣùwọ̀n?

¹³ⓕ Ta ni ó ti mọ ọkàn OLÚWA, tàbí tí ó ti tọ́ ọ sọ́nà gẹ́gẹ́ bí olùdámọ̀ràn rẹ̀?

¹⁴Ta ni OLÚWA ké sí kí ó là á lọ́yẹ àti ta ni ó kọ́ òun ní ọ̀nà tí ó tọ́? Ta ni ẹni náà tí ó kọ́ ọ ní ọgbọ́n tàbí tí ó fi ipa ọ̀nà òye hàn án?

¹⁴

¹⁵Nítòótọ́ àwọn orílẹ̀ èdè dàbí i ẹ̀kán-omi nínú garawa; a kà wọ́n sí gẹ́gẹ́ bí eruku lórí ìwọ̀n; ó wọn àwọn erékùṣù àfi bí eruku múnúmúnú ni wọ́n.

¹⁶Lẹ́bánónì kò tó fún pẹpẹ iná, tàbí kí àwọn ẹranko rẹ̀ kí ó tó fún ẹbọ sísun.

¹⁷Níwájúù rẹ ni gbogbo orílẹ̀ èdè dàbí ohun tí kò sí; gbogbo wọn ló kà sí ohun tí kò wúlò tí kò tó ohun tí kò sí.

¹⁷

¹⁸Ta ni nígbà náà tí ìwọ yóò fi Ọlọ́run wé? Ère wo ni ìwọ yóò fi ṣe àkàwé rẹ̀?

¹⁹Ní ti ère, oníṣọ̀nà ni ó dà á, ti alágbẹ̀dẹ wúrà sì fi wúrà bò ó tí a sì ṣe ẹ̀wọ̀n ọ̀nà sílífà fún un.

²⁰Ọkùnrin kan tí ó talákà ju kí ó lè mú irú ọrẹ bẹ́ẹ̀ wá, wá igi tí kò le è rà. Ó wá oníṣọ̀nà tí ó dáńtọ́ láti ṣe àgbékalẹ̀ ère tí kì yóò le è ṣubú.

²⁰

²¹Ǹjẹ́ o kò tí ì mọ̀ ìwọ kò tí ì gbọ́? A kò tí ì sọ fún ọ láti ìbẹ̀rẹ̀ wá? Ìwọ kò tí ì mọ láti ìgbà ìpilẹ̀ ayé?

²²Òun jókòó lórí Ìtẹ́ ní òkè òbììrí ilẹ̀ ayé, àwọn ènìyàn rẹ̀ sì dàbí i láńtata. Ó ta àwọn ọ̀run bí ìbòrí ìgúnwà, ó sì nà wọ́n jáde gẹ́gẹ́ bí àgọ́ láti gbé.

²³Ó sọ àwọn ọmọ ọba di aṣán àti àwọn aláṣẹ ayé yìí ni ó ti sọ dòfo.

²⁴Gẹ́rẹ́ tí a ti gbìn wọ́n, kété tí a gbìn wọ́n, kété tí wọ́n tita ẹ̀kan nínú ilẹ̀, bẹ́ẹ̀ ni ó fẹ́ atẹ́gùn lù wọ́n gbogbo wọn sì gbẹ, bẹ́ ni ìji-líle sì gbá wọn lọ gẹ́gẹ́ bí ìyàngbò.

²⁴

²⁵“Ta ni ẹ ó fi mi wé? Tàbí ta ni ó bámi dọ́gba?” ni Ẹni-Mímọ́ wí.

²⁶Gbé ojú rẹ ṣókè kí o sì wo àwọn ọ̀run: Ta ni ó dá àwọn wọ̀nyí? Ẹni tí ó mú àkójọpọ̀ àwọn ìràwọ̀ jáde wá ní ọ̀kọ̀ọ̀kan tí ó sì pè wọ́n ní orúkọ lọ́kọ̀ọ̀kan. Nítorí agbára ńlá àti ipá rẹ̀, ọ̀kanṣoṣo nínú wọn kò sọnù.

²⁶

²⁷Èéṣe tí o fi sọ, Ìwọ Jákọ́bù àti tí o ṣàròyé, Ìwọ Ísírẹ́lì; “Ọ̀nà mi pamọ́ níwájú OLÚWA; ìṣe mi ni a kò kọbi ara sí láti ọwọ́ Ọlọ́run mi”?

²⁸Ìwọ kò tí ì mọ̀? Ìwọ kò tí ì gbọ́? OLÚWA òun ni Ọlọ́run ayérayé, Ẹlẹ́dàá gbogbo ìpẹ̀kun ilẹ̀-ayé. Òun kì yóò ṣàárẹ̀ bẹ́ẹ̀ ni kò ní rẹ̀wẹ̀sì, àti ìmọ̀ rẹ̀ ni ẹnikẹ́ni kò le ṣe òdiwọ̀n rẹ̀.

²⁹Ó ń fi agbára fún àwọn aláàárẹ̀ ó sì fi kún agbára àwọn aláàárẹ̀.

³⁰Àní àwọn ọ̀dọ́ ń rẹ̀wẹ̀sì, ó ń rẹ̀ wọ́n, àwọn ọ̀dọ́mọkùnrin sì ń kọsẹ̀ wọ́n ṣubú;

³¹Ṣùgbọ́n àwọn tí ó gbẹ́kẹ̀lé OLÚWA yóò tún agbára wọn ṣe. Wọn yóò fìyẹ́ fò lókè bí idì; wọn yóò ṣáré àárẹ̀ kò ní mú wọn, wọn yóò rìn òòyì kò ní kọ́ wọn.