Ìwé Wòlíì Àìsáyà 43:1-28 BYB2014 - Bible AI

¹Ṣùgbọ́n ní ìsinsìn yìí, ohun tí OLÚWA wí nìyìí ẹni tí ó dá ọ, Ìwọ Jákọ́bù ẹni tí ó mọ ọ́, Ìwọ Ísírẹ́lì: “Má bẹ̀rù, nítorí Èmi ti dá ọ nídè; Èmi ti pè ọ́ ní orúkọ tèmi ni ìwọ ṣe.

²Nígbà tí ìwọ bá ń la omi kọjá, Èmi yóò wà pẹ̀lúu rẹ; àti nígbà tí ìwọ bá ń la odò kọjá wọn kì yóò bò ọ́ mọ́lẹ̀. Nígbà tí ìwọ bá la iná kọjá, kò ní jó ọ; ahọ́n iná kò ní jó ọ lára.

³Nítorí Èmi ni OLÚWA Ọlọ́run rẹ, Ẹni Mímọ́ Ísírẹ́lì Olùgbàlà rẹ; Èmi fi Éjíbítì ṣe ìràpadà rẹ, Kúṣì àti Ṣébà dípò rẹ.

⁴Nítorí pé o ṣe iyebíye àti ọ̀wọ́n níwájú mi, àti nítorí pé mo fẹ́ràn rẹ, Èmi yóò fi ènìyàn rọ́pò fún ọ, àti ènìyàn dípò ẹ̀míì rẹ.

⁵Má bẹ̀rù nítorí èmi wà pẹ̀lúù rẹ; Èmi yóò mú àwọn ọmọ rẹ láti ìlà oòrùn wá èmi ó sì kó ọ jọ láti ìwọ̀ oòrùn.

⁶Èmi yóò sọ fún àríwá pé, ‘Fi wọ́n sílẹ̀!’ àti fún gúṣù, ‘Má ṣe dá wọn dúró.’ Mú àwọn ọmọkùnrin mi láti ọ̀nà jínjìn wá àti àwọn ọ̀dọ́mọbìnrin mi láti ìpẹ̀kun ilẹ̀ ayé—

⁷ẹnikẹ́ni tí a ń pe orúkọ mi mọ́, tí mo dá fún ògo mi, tí mo mọ̀ àti tí mo ṣe.”

⁷

⁸Sin àwọn tí ó ní ojú ṣùgbọ́n tí wọ́n fọ́jú jáde, tí wọ́n ní etí ṣùgbọ́n tí wọn dití.

⁹Gbogbo orílẹ̀ èdè kóra wọn jọ àwọn ènìyàn sì kóra wọn papọ̀. Ta ni nínú wọn tó sọ àṣọtẹ́lẹ̀ yìí tí ó sì kéde fún wa àwọn nǹkan ti tẹ́lẹ̀? Jẹ́ kí wọ́n mú àwọn ẹlẹ́rìí wọn wọlé wá láti fi hàn pé wọ́n tọ̀nà tó bẹ́ẹ̀ tí àwọn mìíràn yóò gbọ́, tí wọn yóò sọ pé, “Òtítọ́ ni.”

¹⁰“Ẹ̀yin ni ẹlẹ́rìí mi,” ni OLÚWA wí, “Àti ìránṣẹ́ mi tí èmi ti yàn, tó bẹ́ẹ̀ tí ẹ̀yin yóò fi mọ̀ àti tí ẹ̀yin ó fi gbà ḿi gbọ́ tí yóò sì yé e yín pé èmi ni ẹni náà. Ṣáájú mi kò sí ọlọ́run tí a dá, tàbí a ó wa rí òmìíràn lẹ́yìn mi.

¹¹Èmi, àní Èmi, Èmi ni OLÚWA, yàtọ̀ sí èmi, kò sí olùgbàlà mìíràn.

¹²Èmi ti fihàn, mo gbàlà mo sì ti kéde Èmi, kì í sì í ṣe àwọn àjèjì òrìṣà láàrin yín. Ẹ̀yin ni ẹlẹ́rìí mi,” ni OLÚWA wí, “Pé Èmi ni Ọlọ́run.

¹³Bẹ́ẹ̀ ni, àti láti ayérayé Èmi ni ẹni náà. Kò sí ẹnikẹ́ni tí ó lè gbà kúrò lọ́wọ́ mi. Nígbà tí mo bá ṣe nǹkan, ta ni ó lè yí i padà?”

¹⁴Èyí ni ohun tí OLÚWA wí olùràpadà rẹ, Ẹni Mímọ́ ti Ísírẹ́lì; “Nítorí rẹ Èmi yóò ránṣẹ́ sí Bábílónì láti mú wọn sọ̀kalẹ̀ wá gẹ́gẹ́ bí ìsáǹsá, gbogbo ará Bábílónì nínú ọkọ̀ ojú omi nínú èyí tí wọ́n fi ń ṣe ìgbéraga.

¹⁵Èmi ni OLÚWA, Ẹni Mímọ́ rẹ, Ẹlẹ́dàá Ísírẹ́lì, ọba rẹ.”

¹⁵

¹⁶Èyí ni ohun tí OLÚWA wí Ẹni náà tí ó la ọ̀nà nínú òkun, ipa-ọ̀nà láàrin alagbalúgbú omi,

¹⁷ẹni tí ó wọ́ àwọn kẹ̀kẹ́ àti ẹṣin jáde, àwọn jagunjagun àti ohun ìjà papọ̀, wọ́n sì ṣùn ṣíbẹ̀, láìní lè dìde mọ́, wọ́n kú pirá bí òwú fìtílà:

¹⁸“Gbàgbé àwọn ohun àtẹ̀yìnwá; má ṣe gbé nínú ohun àtijọ́.

¹⁹Wò ó, Èmi ń ṣe ohun tuntun! Nísinsìn yìí ó ti yọ ṣókè; àbí o kò rí i bí? Èmi ń ṣe ọ̀nà kan nínú aṣálẹ̀ àti odò nínú ilẹ̀ ṣíṣá.

²⁰Àwọn ẹhànnà ẹranko bọ̀wọ̀ fún mi, àwọn ajáko àti àwọn òwìwí, nítorí pé mo pèṣè omi nínú aṣálẹ̀ àti odò nínú ilẹ̀ ṣíṣá, láti fi ohun-mímu fún àwọn ènìyàn mi, àyànfẹ́ mi,

²¹àwọn ènìyàn tí mo dá fún ara mi kí wọn kí ó lè kéde ìyìn mi.

²¹

²²“Ṣíbẹ̀ ṣíbẹ̀ ìwọ kò tí ì ké pè mí, Ìwọ Jákọ́bù, àárẹ̀ kò tí ì mú ọ nítoríì mi Ìwọ Ísírẹ́lì.

²³Ìwọ kò tí ì mú àgùntàn wá fún mi fún ẹbọ ọrẹ sísan, tàbí kí o bọ̀wọ̀ fún mi pẹ̀lú ẹbọ rẹ. Èmi kò tí ì wàhálà rẹ pẹ̀lú ọrẹ oníhóró tàbí kí n dààmú rẹ pẹ̀lú ìbéèrè fún tùràrí.

²⁴Ìwọ kò tí ì ra kálámọ́ọ́sì olóòórùn dídùn fún mi, tàbí kí o da ọ̀rá-ẹbọ rẹ bò mí. Ṣùgbọ́n ẹ ti wàhálà mi pẹ̀lú ẹ̀ṣẹ̀ yín ẹ sì ti dààmú mi pẹ̀lú àìṣedédé yín.

²⁴

²⁵“Èmi, àní Èmi, Èmi ni ẹni tí ó wẹ àwọn àìṣedédé rẹ nù, nítorí èmi fún ara mi, tí n kò sì rántí àwọn ẹ̀ṣẹ̀ rẹ mọ́.

²⁶Bojú wo ẹ̀yìn rẹ fún mi, jẹ́ kí a jọ ṣe àríyànjiyàn ọ̀rọ̀ náà papọ̀; ro ẹjọ́ láti fihàn pé o kò lẹ́ṣẹ̀ lọ́rùn.

²⁷Baba yín àkọ́kọ́ dẹ́ṣẹ̀; àwọn agbẹnusọ yín ṣọ̀tẹ̀ sí mi.

²⁸Nítorí náà, èmi yóò dójú ti àwọn ẹni àyẹ́sí inú tẹ́ḿpìlìi yín, bẹ́ẹ̀ ni èmi yóò mú ìparun bá Jákọ́bù àti ìtìjú bá Ísírẹ́lì.