Ìwé Wòlíì Àìsáyà 44:1-28 BYB2014 - Bible AI

¹“Ṣùgbọ́n tẹ́tísílẹ̀ nísinsìn yìí, Ìwọ Jákọ́bù, Ìránṣẹ́ mi Ísírẹ́lì, ẹni tí mo ti yàn.

²Ohun tí OLÚWA wí nìyìí ẹni tí ó dá ọ, ẹni tí ó ti mọ̀ ọ́ láti inú ìyá rẹ wá, àti ẹni tí yóò ràn ọ́ lọ́wọ́ pẹ̀lú: Má ṣe bẹ̀rù, Ìwọ Jákọ́bù, ìránṣẹ́ mi, Jéṣúrúnì ẹni tí mo ti yàn.

³Nítorí èmi yóò da omi sí ilẹ̀ tí ń pòǹgbẹ àti àwọn odò ni ilẹ̀ gbígbẹ; Èmi yóò tú Ẹ̀mí mi sí ara àwọn ọmọ rẹ, àti ìbùkún mi sóri àwọn àrọ́mọdọ́mọ rẹ.

⁴Wọn yóò dàgbà ṣókè gẹ́gẹ́ bí i koríko nínú pápá oko tútù, àti gẹ́gẹ́ bí igi póǹpóla léti odò tí ń sàn.

⁵Ọ̀kan yóò wí pé, ‘Èmi jẹ́ ti OLÚWA’; òmìíràn yóò pe ara rẹ̀ gẹ́gẹ́ bí orúkọ Jákọ́bù; bẹ́ẹ̀ ni òmìíràn yóò kọ ọ́ sí ọwọ́ rẹ̀, Ti OLÚWA, yóò sì máa jẹ́ orúkọ náà Ísírẹ́lì.

⁶ⓐ “Ohun tí OLÚWA wí nìyìí ọba Ísírẹ́lì àti Olùdáǹdè, àní OLÚWA àwọn ọmọ-ogun: Èmi ni ẹni àkọ́kọ́ àti ẹni ìgbẹ̀yìn, lẹ́yin mi kò sí Ọlọ́run kan.

⁷Ta ni ó dàbí ì mi? Jẹ́ kí o kéde rẹ̀. Jẹ́ kí ó wí kí ó sì gbé síwájú mi Kí ni ó ti ṣẹlẹ̀ láti ìgbà tí mo fi ìdí àwọn ènìyàn ìṣẹ̀ǹbáyé kalẹ̀, àti kí ni ohun tí ń sì ń bọ̀ bẹ́ẹ̀ ni, jẹ́ kí ó sọ aṣọtẹ́lẹ̀ ohun tí ń bọ̀ wá.

⁸Má ṣe wárìrì, má ṣe bẹ̀rù. Ǹjẹ́ èmi kò ti kéde èyí tí mo sì ti sọ àṣọtẹ́lẹ̀ rẹ̀ típẹ́típẹ́? Ẹ̀yin ni ẹlẹ́rìí mi. Ǹjẹ́ Ọlọ́run kan ha ń bẹ lẹ́yìn mi? Bẹ́ẹ̀ kọ́, kò sí àpáta mìíràn; Èmi kò mọ ọ̀kankan.”

⁸

⁹Gbogbo àwọn tí ń gbẹ́ ère jásí asán, àti àwọn ohun tí wọn ń kó pamọ́ kò jámọ́ nǹkankan. Àwọn tí yóò sọ̀rọ̀ fún wọn fọ́ lójú; wọ́n jẹ́ aláìmọ́kan sí ìtìjú ara wọn.

¹⁰Ta ni ó mọ òrìṣà kan tí ó sì ya ère, tí kò lè mú èrè kankan wá fún un?

¹¹Òun àti nǹkan rẹ̀ wọ̀nyí ni a ó dójú tì; àwọn oníṣọ̀nà kò yàtọ̀, ènìyàn ni wọ́n. Jẹ́ kí gbogbo wọn gbárajọ kí wọ́n sì fi ìdúró wọn hàn; gbogbo wọn ni a ó mú bọ́ sínú Ìpayà àti àbùkù.

¹¹

¹²Alágbẹ̀dẹ mú ohun èlò, ó fi ń ṣiṣẹ́ nínú èédú; ó fi òòlù ya ère kan, ó ṣe é pẹ̀lú agbára apá rẹ̀, Ebi ń pa á, àárẹ̀ sì mú un; kò mu omi rárá, ìrẹ̀wẹ̀sì dé bá a.

¹³Gbẹ́nàgbẹ́nà fi ìwọ̀n wọ̀n ọ́n ó sì fi lẹ́ẹ̀dì ṣe àmì sí ara rẹ̀, Ó tún fi ṣísẹ́lì họ ọ́ jáde ó tún fi kọ́ḿpáásì ṣe àmì sí i. Ó gbẹ́ ẹ ní ìrí ènìyàn gẹ́gẹ́ bí ènìyàn nínú ògo rẹ̀, kí ó lè máa gbé nínú ilé òrìṣà.

¹⁴Ó gé igi kédárì lulẹ̀, tàbí bóyá ó mú Ṣípírẹ́sì tàbí óákù. Ó jẹ́ kí ó dàgbà láàrin àwọn igi inú igbó, ó sì le gbin igi páínì, èyí tí òjò mú kí ó dàgbà.

¹⁵Ohun èlò ìdáná ni fún ènìyàn; díẹ̀ nínú rẹ̀ ni ó mú láti mú kí ara rẹ̀ lọ́wọ́ọ́rọ́, ó dá iná ó sì fi ṣe àkàrà. Ṣùgbọ́n bákan náà ni ó ṣe òrìṣà tí ó sì ń sìn ín; ó yá ère, ó sì ń forí balẹ̀ fún un.

¹⁶Ìlàjì igi náà ni ó jó nínú iná; lóríi rẹ̀ ni ó ti ń tọ́jú oúnjẹ rẹ̀, ó dín ẹran rẹ̀ ó sì jẹ àjẹyó. Ó tún mú ara rẹ̀ gbóná ó sì sọ pé, “Á à! Ara mi gbóná, mo rí iná.”

¹⁷Nínú èyí tí ó kù ni ó ti ṣe òrìṣà, ère rẹ̀; ó forí balẹ̀ fún un, ó sì sìn ín. Ó gbàdúrà sí i, ó wí pé, “Gbà mí, ìwọ ni Ọlọ́run mi.”

¹⁸Wọn kò mọ nǹkankan, nǹkankan kò yé wọn; a fi ìbòjú bo ojú wọn, wọn kò lè rí nǹkankan; bẹ́ẹ̀ ni àyà wọn sébọ́, wọn kò lè mọ nǹkankan.

¹⁹Kò sí ẹni tí ó dúró láti ronú, kò sí ẹni tí ó ní ìmọ̀ tàbí òye láti sọ wí pé, “Ìlàjì rẹ̀ ni mo fi dáná; Mo tilẹ̀ ṣe àkàrà lórí èédú rẹ̀, Mo dín ẹran, mo sì jẹ ẹ́. Ǹjẹ́ ó wá yẹ kí n ṣe ohun ìríra kan nínú èyí tí ó ṣẹ́kù bí? Ǹjẹ́ èmi yóò ha foríbalẹ̀ fún ìtì igi?”

²⁰Ó ń jẹ eérú, ọkàn ẹlẹ̀tàn ni ó sì í lọ́nà; òun kò lè gba ara rẹ̀ là, tàbí kí ó wí pé “Ǹjẹ́ nǹkan tí ó wà lọ́wọ́ ọ̀tún mi yìí irọ́ kọ́?”

²⁰

²¹“Rántí àwọn nǹkan wọ̀nyí, Ìwọ Jákọ́bù nítorí ìránṣẹ́ mi ni ìwọ, Ìwọ Ísírẹ́lì. Èmi ti dá ọ, ìránṣẹ́ mi ni ìwọ ṣe, Èmi Ísírẹ́lì, Èmi kì yóò gbàgbé rẹ.

²²Èmi ti gbá gbogbo ìkùnà rẹ dànù bí i kùrukùru, àwọn ẹ̀ṣẹ̀ rẹ bí ìrì òwúrọ̀. Padà sọ́dọ̀ mi, nítorí mo ti rà ọ́ padà.”

²²

²³ⓑ Kọrin fáyọ̀, ẹ̀yin ọ̀run, nítorí OLÚWA ló ti ṣe èyí; kígbe ṣókè, Ìwọ ilẹ̀ ayé níṣàlẹ̀. Bú sí orin, ẹ̀yin òkè ńlá, ẹ̀yin igbó àti gbogbo igi yín, nítorí OLÚWA ti ra Jákọ́bù padà, ó ti fi ògo rẹ̀ hàn ní Ísírẹ́lì.

²⁴“Ohun tí OLÚWA wí nìyìí Olùràpadà rẹ tí ó mọ ọ́ láti inú ìyá rẹ wá:

²⁴“Èmi ni OLÚWA tí ó ti ṣe ohun gbogbo tí òun nìkan ti na àwọn ọ̀run tí o sì tẹ́ ayé pẹrẹṣẹ òun tìkálára rẹ̀,

²⁵ⓒ “ta ni ó ba àmì àwọn wòlíì èké jẹ́ tí ó sì sọ àwọn tí ń woṣẹ́ fún ni di òmùgọ̀, tí ó dojú ìmọ̀ àwọn ọlọgbọ́n délẹ̀ tí ó sì sọ wọ́n di òmùgọ̀,

²⁶ẹni tí ó gbé ọ̀rọ̀ àwọn ìránṣẹ́ rẹ̀ jáde tí ó sì mú àṣọtẹ́lẹ̀ àwọn ìránṣẹ́ rẹ wá sí ìmúṣẹ,

²⁶“ẹni tí ó wí nípa ti Jérúsálẹ́mù pé, ‘a ó máa gbénú un rẹ̀,’ àti ní ti àwọn ìlú Júdà, ‘A ó tún un kọ́,’ àti àwọn ahoro rẹ̀, ‘Èmi yóò mú un bọ̀sípò,’

²⁷ta ni ó sọ fún omi jínjìn pé, ‘Ìwọ gbẹ, èmi yóò sì mú omi odò rẹ gbẹ,’

²⁸ta ni ó sọ nípa Ṣáírọ́ọ́ṣì pé, ‘Òun ni Olùṣọ́-àgùntàn mi àti pé òun yóò ṣe ohun gbogbo tí mo fẹ́; òun yóò sọ nípa Jérúsálẹ́mù pé, “Jẹ́ kí a tún un kọ́,” àti nípa tẹ́ḿpìlì, “Jẹ́ kí a fi ìpìlẹ̀ rẹ̀ lé ilẹ̀.” ’