Ìwé Wòlíì Àìsáyà 45:1-25 BYB2014 - Bible AI

¹Èyí ni ohun tí OLÚWA sọ fún ẹni òróró rẹ̀, sí Kírúsì, ọwọ́ ọ̀tún ẹni tí mo dì mú láti dojú àwọn orílẹ̀ èdè bolẹ̀ níwájú rẹ̀ àti láti gba ohun ìjà àwọn ọba lọ́wọ́ wọn, láti sí àwọn ìlẹ̀kùn níwájú rẹ̀ tí ó fi jẹ́ pé a kì yóò ti àwọn ẹnu-ọ̀nà.

²Èmi yóò lọ ṣíwájú rẹ èmi ó sì tẹ́ àwọn òkè ńlá pẹrẹṣẹ Èmi yóò fọ gbogbo ẹnu-ọ̀nà idẹ èmi ó sì gé ọ̀pá irin.

³Èmi yóò sì fún ọ ní àwọn ọrọ̀ ibi òkùnkùn, ọrọ̀ tí a kó pamọ́ sí àwọn ibi tí ó farasin, Tó bẹ́ẹ̀ tí ìwọ yóò fi mọ̀ pé Èmi ni OLÚWA, Ọlọ́run Ísírẹ́lì, ẹni tí ó pè ọ́ pẹ̀lú orúkọ rẹ.

⁴Nítorí Jákọ́bù ìránṣẹ́ mi àti Ísírẹ́lì ẹni tí mo yàn Mo pè ọ́ pẹ̀lú orúkọ rẹ, mo sì gbé oyè kan kà ọ́ lórí bí ó tilẹ̀ jẹ́ pé ìwọ kò gbà mí.

⁵Èmi ni OLÚWA, àti pé kò sí ẹlòmìíràn; yàtọ̀ sí èmi kò sí ọlọ́run kan, Èmi yóò fún ọ ní okun, bí o kò tilẹ̀ tí ì gbà mí,

⁶tí o fi jẹ́ pé láti ìlà oòrùn títí dé ibi ìwọ̀ rẹ̀ kí ènìyàn le mọ̀, kò sí ẹnìkan lẹ́yìn mi.

⁷Mo dá ìmọ́lẹ̀, mo sì dá òkùnkùn mo mú àlàáfíà wá, mo sì dá àjálù; Èmi OLÚWA ni ó ṣe nǹkan wọ̀nyí.

⁷

⁸“Ìwọ ọ̀run lókè rọ òjò òdodo sílẹ̀; jẹ́ kí àwọ̀sánmọ̀ kí ó rọ̀ ọ́ sílẹ̀. Jẹ́ kí ilẹ̀ kí ó yanu gbàgàdà, jẹ́ kí ìgbàlà kí ó dìde sókè, jẹ́ kí òdodo kí ó dàgbà pẹ̀lú rẹ̀; Èmi OLÚWA ni ó ti dá a.

⁸

⁹ⓐ “Ègbé ni fún ènìyàn tí ó ń bá Ẹlẹ́dàá rẹ̀ jà, ẹni tí òun jẹ́ àpáàdì kan láàrin àwọn àpáàdì tí ó wà lórí ilẹ̀. Ǹjẹ́ amọ̀ lè sọ fún amọ̀kòkò, pé: ‘Kí ni ohun tí ò ń ṣe?’ Ǹjẹ́ iṣẹ́ rẹ lè sọ pé, ‘Òun kò ní ọwọ́?’

¹⁰Ègbé ni fún ẹni tí ó sọ fún baba rẹ̀ pé ‘Kí ni o bí?’ tàbí sí ìyá rẹ̀, ‘Kí ni ìwọ ti bí?’

¹⁰

¹¹“Ohun tí OLÚWA wí nìyìí Ẹni Mímọ́ Ísírẹ́lì, àti Ẹlẹ́dàá rẹ̀: Nípa ohun tí ó ń bọ̀, ǹjẹ́ o ń bi mí léèrè nípa àwọn ọmọ mi, tàbí kí o pàṣẹ fún mi nípa iṣẹ́ ọwọ́ mi bí?

¹²Èmi ni ẹni tí ó dá ilẹ̀ ayé tí ó sì da ọmọnìyàn sóríi rẹ̀. Ọwọ́ mi ni ó ti ta àwọn ọ̀run mo sì kó àwọn agbájọ ìràwọ̀ rẹ̀ síta

¹³Èmi yóò gbé Kírúsì ṣókè nínú òdodo mi: Èmi yóò mú kí gbogbo ọ̀nà rẹ̀ kí ó tọ́. Òun yóò tún ìlú mi kọ́ yóò sì tú àwọn àtìpó mi sílẹ̀, ṣùgbọ́n kì í ṣe fún owó tàbí ẹ̀bùn kan, ni OLÚWA àwọn ọmọ-ogun wí.”

¹⁴ⓑ Ohun tí OLÚWA wí nìyìí: “Àwọn èròjà ilẹ̀ Éjíbítì àti àwọn ọjà ilẹ̀ Kúṣì, àti àwọn Ṣábíáṣì— wọn yóò wá sọ́dọ̀ rẹ wọn yóò sì jẹ́ tìrẹ; wọn yóò máa wọ́ tẹ̀lé ọ lẹ́yìn, wọn yóò máa wá lọ́wọ̀ọ̀wọ́. Wọn yóò máa foríbalẹ̀ níwájú rẹ̀, wọn yóò sì máa bẹ̀bẹ̀ níwájú rẹ pé, ‘Nítòótọ́ Ọlọ́run wà pẹ̀lú rẹ kò sì sí ẹlòmìíràn; kò sí ọlọ́run mìíràn.’ ”

¹⁵Nítòótọ́ ìwọ jẹ́ Ọlọ́run tí ó fi ara rẹ̀ pamọ́, Ìwọ Ọlọ́run àti Olùgbàlà Ísírẹ́lì

¹⁶Gbogbo àwọn tí ó ń gbẹ́ ère ni ojú yóò tì wọn yóò sì kan àbùkù; gbogbo wọn ni yóò bọ́ sínú àbùkù papọ̀.

¹⁷ⓒ Ṣùgbọ́n Ísírẹ́lì ni a ó gbàlà láti ọwọ́ OLÚWA Pẹ̀lú ìgbàlà ayérayé; a kì yóò kàn yín lábùkù tàbí kí a dójú tì yín, títí ayé àìnípẹ̀kun.

¹⁷

¹⁸Nítorí èyí ni ohun tí OLÚWA wí— ẹni tí ó dá àwọn ọ̀run, Òun ni Ọlọ́run; ẹni tí ó mọ tí ó sì dá ayé, Òun ló ṣe é; Òun kò dá a láti wà lófo, ṣùgbọ́n ó ṣe é kí a lè máa gbé ibẹ̀— Òun wí pé: “Èmi ni OLÚWA, kò sì sí ẹlòmìíràn.

¹⁹Èmi kò sọ̀rọ̀ níbi tí ó farasin, láti ibìkan ní ilẹ̀ òkùnkùn; Èmi kò tí ì sọ fún àwọn ìran Jákọ́bù pé ‘Ẹ wá mi lórí asán.’ Èmi OLÚWA sọ òtítọ́; Mo sì sọ èyí tí ó tọ̀nà.

¹⁹

²⁰“Ẹ kó ara yín jọ kí ẹ sì wá; ẹ kórajọ, ẹ̀yin ìṣáǹṣá láti àwọn ọrílẹ̀ èdè wá. Aláìmọ̀kan ni àwọn tí ó ń ru ère igi káàkiri, tí wọ́n gbàdúrà sí àwọn òrìṣà tí kò le gba ni.

²¹J ⓓ ẹ́ kí a mọ ohun tí yóò ṣẹlẹ̀, fihàn wá jẹ́ kí wọn jọ dámọ̀ràn papọ̀. Ta ló ti sọ èyí lọ́jọ́ tí o ti pẹ́, ta ló ti wí èyí láti àtètèkọ́ṣe? Kì í ha á ṣe Èmi, OLÚWA? Àti pé kò sí Ọlọ́run mìíràn lẹ́yìn mi, Ọlọ́run olódodo àti olùgbàlà; kò sí ẹlòmìíràn àfi èmi.

²¹

²²“Yípadà sí mi kí a sì gbà ọ́ là, ẹ̀yin ìpẹ̀kun ilẹ̀-ayé; nítorí Èmi ni Ọlọ́run kò sì sí ẹlòmìíràn.

²³ⓔ Nípa èmi tìkálára mi ni mo ti búra, ẹnu mi ni ó ti sọ ọ́ pẹ̀lúu gbogbo ipá mi ọ̀rọ̀ náà tí a kì yóò lè parẹ́: Níwájú mi ni gbogbo orúnkún yóò wólẹ̀; nípa mi ni gbogbo ahọ́n yóò búra.

²⁴Wọn yóò sọ ní ti èmi, ‘Nínú OLÚWA nìkan ni òdodo àti agbára wà.’ ” Gbogbo àwọn tí ó ti bínú sí; yóò wá sọ́dọ̀ rẹ̀ a ó sì dójú tì wọn.

²⁵Ṣùgbọ́n nínú OLÚWA gbogbo àwọn ìran Ísírẹ́lì ni a ó rí ní òdodo, a o sì gbé wọn ga.