Ìwé Wòlíì Ísíkẹ́lì 27:1-36 BYB2014 - Bible AI

¹Ọ̀rọ̀ OLÚWA tún tọ̀ mí wá wí pé:

²“Ọmọ ènìyàn, pohùnréré ẹkún fún Tírè.

³Sọ fún Tírè, tí a tẹ̀dó sí ẹnu bodè òkun, oníṣòwò àwọn orílẹ̀-èdè fún ọ̀pọ̀lọpọ̀ erékùṣù. ‘Èyí yìí ní OLÚWA Ọlọ́run wí:

³“ ‘Ìwọ Tírè wí pé “Ẹwá mi pé.”

⁴Ààlà rẹ wà ní àárin òkun; àwọn ọ̀mọ̀lé rẹ ti mú ẹwà rẹ pé.

⁵Wọn ti fi pákó firi ti Sénárì kan gbogbo ọkọ̀ rẹ, wọ́n ti mú kédárì ti Lébánónì wá láti fi ṣe òpó ọkọ̀ fún ọ.

⁶Nínú igi Oákù ti Báṣánì ní wọn ti fi gbẹ́ ìtukọ̀ òbèlè rẹ̀; ìjókòó rẹ ni wọn fi eyín erin ṣe pẹ̀lú igi bókísì láti erékùsù Kítímù wá

⁷Asọ funfun dáradára tí a fi abẹ́rẹ́ ṣiṣẹ́ ọ̀nà sí lára láti Éjíbítì wá ni èyí tí ìwọ ta láti se okun ọkọ̀ aṣọ aláró àti elésèé àlùkò láti erékùṣù ti Èlíṣà ni èyí tí a fi bò ó

⁸Àwọn ará ìlú Sídónì àti Árífádì ni àwọn ìtukọ̀ rẹ̀ àwọn ọlọ́gbọ́n ẹ̀rọ rẹ, ìwọ Tírè, tí wọ́n wà nínú rẹ ni àwọn àtukọ̀ rẹ.

⁹Àwọn àgbà Gíbálì, àti àwọn ọlọ́gbọ́n ibẹ̀, wà nínú ọkọ̀ bí òṣìṣẹ́ atukọ̀ rẹ, gbogbo ọkọ̀ ojú òkun àti àwọn atukọ̀-òkun wá pẹ̀lú rẹ láti dòwò pọ̀ pẹ̀lú rẹ̀.

⁹

¹⁰“ ‘Àwọn ènìyàn Páṣíà, Lídíà àti Pútì wà nínú jagunjagun rẹ àwọn ẹgbẹ́ ọmọ ogun rẹ. Wọ́n gbé àpáta àti àsíborí wọn ró sára ògiri rẹ, wọn fi ẹwà rẹ hàn.

¹¹Àwọn ènìyàn Árífádì àti Hélékì wà lórí odi rẹ yíká; àti àwọn akọni Gámádì, wà nínú ilé ìṣọ́ rẹ. Wọ́n fi àwọn asà wọn kọ ara odi rẹ; wọn ti mú ẹwà rẹ pé.

¹²“ ‘Táṣíṣì ṣòwò pẹ̀lú rẹ torí ọ̀pọ̀lọpọ̀ ọrọ̀ tí ó ní; wọn ṣe ìpààrọ̀ fàdákà, irin tanúnganran àti òjé fún ọjà títà rẹ̀.

¹³“ ‘Àwọn ará Gíríkì, Túbálì, Jáfánì àti Méṣékì, ṣòwò pẹ̀lú rẹ: wọ́n fi ẹrù àti ohun èlò idẹ ṣe pàsípààrọ̀ fún ọrọ̀ rẹ.

¹⁴“ ‘Àwọn ti ilé Béti Tógárímà ṣe ìpààrọ̀ ẹṣin-ìṣiṣẹ́, ẹṣin-ogun àti ìbàákà ṣòwò ní ọjà rẹ.

¹⁵“ ‘Àwọn ènìyàn Ródísì ni àwọn oníṣòwò rẹ, àti ọ̀pọ̀lọpọ̀ erékùṣù ni wọ́n jẹ́ onibárà rẹ̀; wọ́n mú eyín-erin àti igi ébónì san owó rẹ.

¹⁶“ ‘Árámù ṣòwò pẹ̀lú nítorí ọ̀pọ̀lọpọ̀ iṣẹ́ òwò rẹ̀; wọn ṣe ìpààrọ̀ òkúta iyebíye, òwú elésèé àlùkò, iṣẹ́ ọ̀nà tí a fi abẹ́rẹ́ ṣe, asọ ọ̀gbọ̀ dáradára, ìlẹ̀kẹ̀ iyùn pupa fún ọjà títà rẹ.

¹⁷“ ‘Júdà àti Ísírẹ́lì, àwọn ni oníṣòwò rẹ; wọn ṣe ìpààrọ̀ ọkà, Mínnítì, àkàrà àdídùn; pannági, oyin, epo àti ìpara olóòórùn dídùn ni wọ́n fi ná ọjà rẹ.

¹⁸“ ‘Dámásíkù, ni oníṣòwò rẹ, nítorí ọ̀pọ̀lọpọ̀ ohun ọjà tí ó ṣe àti ọ̀pọ̀lọpọ̀ ọrọ̀; ní ti ọtí wáìnì tí Helíbónì, àti irun àgùntàn funfun.

¹⁹“ ‘Àwọn ará Dánì àti Gíríkì láti Úsálì ra ọjà títà rẹ; irin dídán, káṣíà ati kálámù ni àwọn ohun pàsípààrọ̀ ní ọjà rẹ.

²⁰“ ‘Dédánì ni oníṣòwò rẹ ní aṣọ ìjókòó-lẹ́sin fún ẹṣin-gígùn.

²¹“ ‘Àwọn ará Árábù àti gbogbo àwọn ọmọ aládé Kédárì àwọn ni àwọn onibárà rẹ: ní ti ọ̀dọ́ àgùntàn, àgbò àti ewúrẹ́, nínú ìwọ̀nyí ni wọ́n ti jẹ́ oníbárà rẹ.

²²“ ‘Àwọn oníṣòwò ti Ṣébà àti Rámà, àwọn ni oníṣòwò rẹ; wọ́n ta onírúurú tùràrí olóòórùn dídùn dáradára ní ọjà rẹ, àti àwọn òkúta iyebíye àti wúrà.

²³“ ‘Áránì àti Kánnà àti Édénì, àwọn onísòwò Ṣébà, Ásúrù àti Kílímádì, ni àwọn oníṣòwò rẹ.

²⁴Wọ̀nyí ní onírúurú nǹkan: aṣọ aláró, àti oniṣẹ́-ọnà àti àpótí aṣọ oníyebíye, tí a fi okùn dì, tí a sì fi igi kédárì ṣe, nínú àwọn ilé-ìtajà rẹ.

²⁵“ ‘Àwọn ọkọ̀ Táṣíṣì ní èrò ní ọjà rẹ a ti mú ọ gbilẹ̀ a sì ti ṣe ọ́ lógo ní àárin gbungbun òkun

²⁶Àwọn atukọ̀ rẹ ti mú ọ wá sínú omi ńlá. Ṣùgbọ́n afẹ́fẹ́ ìlà oòrùn yóò fọ́ ọ sí wẹ́wẹ́ ní àárin gbùngbùn òkun.

²⁷Ọrọ̀ rẹ, ọjà rẹ àti àwọn ohun títà rẹ, àwọn atọ́kọ̀ rẹ, òṣìṣẹ́ ìtukọ̀ rẹ. Àwọn oníbárà rẹ àti gbogbo àwọn jagunjagun rẹ, tí ó wà nínú rẹ àti nínú gbogbo ẹgbẹ́ rẹ tí ó wà ní àárin rẹ yóò rì sínú àárin gbùngbùn òkun ní ọjọ́ ìparun rẹ.

²⁸Ilẹ̀ etí òkun yóò mì nítorí ìró igbe àwọn atọ́kọ̀ rẹ.

²⁹Gbogbo àwọn alájẹ̀ àwọn atukọ̀ àti àwọn atọ́kọ̀ ojú òkun; yóò sọ̀ kálẹ̀ kúrò nínú ọkọ̀ wọn, wọn yóò dúró lórí ilẹ̀.

³⁰Wọn yóò jẹ́ kí a gbọ́ ohùn wọn lòdì sí ọ wọn yóò sì sunkún kíkorò lé ọ lórí wọn yóò ku eruku lé orí ara wọn wọn yóò sì yí ara wọn nínú eérú.

³¹Wọn yóò fá irun orí wọn nítorí rẹ wọn yóò wọ aṣọ yíya wọn yóò pohùnréré ẹkún pẹ̀lú ìkoro ọkàn nítorí rẹ pẹ̀lú ohùn réré ẹkún kíkorò.

³²Àti nínú arò wọn ni wọn yóò sì pohùn réré ẹkún fún ọ wọn yóò sì pohùnréré ẹkún sórí rẹ, wí pé: “Ta ni ó dàbí Tírè èyí tí ó parun ní àárin òkun?”

³³Nígbà tí ọjà títà rẹ ti òkun jáde wá ìwọ tẹ́ ọ̀pọ̀lọpọ̀ orílẹ̀ èdè lọ́rùn ìwọ fi ọrọ̀ tí ó pọ̀ àti àwọn ọjà títà rẹ sọ àwọn ọba ayé di ọlọ́rọ̀.

³⁴Ní ìsinsìn yìí tí òkun fọ ọ túútúú nínú ibú omi; nítorí náà òwò rẹ àti gbogbo ẹgbẹ́ rẹ ní àárin rẹ, ni yóò ṣubú.

³⁵Ẹnu yóò ya gbogbo àwọn ti ń gbé ní erékùṣù náà sí ọ àwọn ọba wọn yóò sì dìjì, ìyọnu yóò sì yọ ní ojú wọn.

³⁶Àwọn oníṣòwò láàrin àwọn orílẹ̀ èdè dún bí ejò sí ọ ìwọ yóò sì jẹ́ ẹ̀rù ìwọ kì yóò sì sí mọ́ láéláé.’ ”