Ìwé Wòlíì Ísíkẹ́lì 28:1-26 BYB2014 - Bible AI

¹Ọ̀rọ̀ OLÚWA tún tọ̀ mí wá wí pé:

²ⓐ “Ọmọ ènìyàn, sọ fún ọmọ-aládé Tírè pé, ‘Báyìí ní OLÚWA Ọlọ́run wí:

²“ ‘Nítorí tí ọkàn rẹ gbé sókè simi ìwọ wí pé, “Èmi ni Ọlọ́run; Èmi jókòó sí orí ìtẹ́ òrìṣà ní àárin gbùngbùn òkun.” Ṣùgbọ́n ènìyàn ni ọ́, kì i ṣe òrìṣà, bí ó tilẹ̀ jẹ́ wí pé ìwọ rò pé ìwọ gbọ́n bí Ọlọ́run.

³Ìwọ gbọ́n ju Dáníẹ́lì lọ bí? Ṣé kò sí àsírí kan tí ó pamọ́ fún ọ?

⁴Pẹ̀lú ọgbọ́n àti ìmọ̀ rẹ ìwọ tí jèrè ọrọ̀ fún ara rẹ àti àkójọpọ̀ wúrà àti fàdákà nínú àwọn ilé ìṣúra rẹ.

⁵Nípa ọgbọ́n rẹ ńlá àti nípa òwò rẹ ìwọ ti sọ ọrọ̀ rẹ di púpọ̀ àti nítorí ọrọ̀ rẹ di púpọ̀, ọkàn rẹ gbé sókè Nitorí ọrọ̀ rẹ.

⁶“ ‘Nítorí náà èyí yìí ní OLÚWA Ọlọ́run wí: “ ‘Nítorí pé ìwọ rò pé o gbọ́n, pé ìwọ gbọ́n bí Ọlọ́run

⁷Èmi yóò mú kí àwọn àjòjì dìde sí ọ, ẹlẹ́rù nínú àwọn orílẹ̀ èdè; wọn yóò yọ idà wọn sí ọ ẹwà rẹ àti ọgbọ́n rẹ wọn yóò sì ba dídán rẹ̀ jẹ́.

⁸Wọn yóò mú ọ sọ̀ kalẹ̀ wá sínú ihò ìwọ yóò sì kú ikú gbígbóná àwọn tí a pa ní àárin òkun.

⁹Ṣé ìwọ yóò wá wí pé, “Èmi ni Ọlọ́run,” ní ojú àwọn tí ó pa ọ́? Ìwọ yóò jẹ́ ènìyàn, kì í ṣe Ọlọ́run, ní ọwọ́ àwọn ti yóò pa ọ́

¹⁰Ìwọ yóò kú ikú aláìkọlà ní ọwọ́ àwọn àjòjì

¹⁰Èmi ni ó ti sọ ọ́, ní OLÚWA Ọlọ́run wí.’ ”

¹¹Ọ̀rọ̀ OLÚWA tún tọ̀ mí wá wí pé:

¹²“Ọmọ ènìyàn, pohùnréré ẹkún sórí ọba Tírè kí ó sì sọ fún un pé: ‘Èyí yìí ni ohun tí OLÚWA Ọlọ́run wí:

¹²“ ‘Ìwọ jẹ́ àpẹrẹ ìjẹ́pípé náà o kún fún ọgbọ́n, o sì pé ní ẹwà

¹³Ìwọ ti wà ní Édẹ́nì, ọgbà Ọlọ́run; onírúurú òkúta iyebíye ni ìbora rẹ; sárídù, tópásì àti díámọ́ndì, bérílì oníkì, àti jásípérì, sáfírè, émérálídì àti káríbúnkílì, àti wúrà ìpilẹ̀ṣẹ̀ rẹ àti àwọn òkè rẹ ní a dà láti ara wúrà, ní ọjọ́ tí á dá ọ ní a pèsè wọn.

¹⁴A fi àmì òróró yàn ọ́ gẹ́gẹ́ bí olùtọ́jú kérúbù, torí èyí ni mo fi yàn ọ́. Ìwọ wà lórí òkè mímọ́ Ọlọ́run; ìwọ rìn ni àárin òkúta amúbína,

¹⁵Ìwọ pé ní ọ̀nà rẹ láti ọjọ́ tí a ti dá ọ títí a fi rí àìṣedéédéé ní inú rẹ.

¹⁶Nípa ìtànkálẹ̀ òwò rẹ ìwọ kún fún ìwà ipá; ìwọ sì dẹ́sẹ̀ Nítorí náà ni mo ṣe sọ ọ nù bí ohun àìlọ́wọ̀ kúrò lórí òkè Ọlọ́run. Èmi sì pa ọ run, ìwọ kérúbù, tí ó bọ́ kúrò ní àárin òkúta amúbínà

¹⁷Ọkàn rẹ gbéraga nítorí ẹwà rẹ. Ìwọ sì ba ọgbọ́n rẹ jẹ́ nítorí dídára rẹ. Nítorí náà mo le ọ sórí ayé; mo sọ ọ di awò ojú níwájú àwọn ọba.

¹⁸Nípa ẹ̀ṣẹ̀ púpọ̀ rẹ àti òwò àìsòótọ́ rẹ ìwọ ti ba àwọn ibi mímọ́ rẹ jẹ́. Nítorí náà mo mú kí iná jáde wá láti inú rẹ, yóò sì jó ọ run, èmi yóò sì sọ ọ́ di eérú lórí ilẹ̀ lójú gbogbo àwọn tí ó ń wò ọ́.

¹⁹Gbogbo orílẹ̀ èdè tí ó mọ̀ ọ́ ní ẹnu ń yà sí ọ; ìwọ yóò sì jẹ́ ẹ̀rù ìwọ kì yóò sì sí mọ́ láéláé.’ ”

²⁰ⓑ Ọ̀rọ̀ OLÚWA tún tọ̀ mí wá wí pé:

²¹“Ọmọ ènìyàn, kọ ojú sí Sídónì; kí o sì ṣọtẹ́lẹ̀ sí i

²²Kí ó sì wí pé: ‘Báyìí ni OLÚWA Ọlọ́run wí:

²²“ ‘Èmi lòdì sí ọ, ìwọ Sídónì, a ó sì ṣe mí lógo láàárin rẹ. Wọn yóò, mọ̀ pé èmi ní OLÚWA, Nígbà tí mo bá mú ìdájọ́ mi ṣẹ nínú rẹ tí a sì yá mí sí mímọ́ nínú rẹ,

²³Èmi yóò sì rán àjàkálẹ̀-àrùn sínú rẹ èmi yóò sì mú kí ẹ̀jẹ̀ ṣàn ní ìgboro rẹ ẹni ti á pa yóò ṣubú ní àárin rẹ pẹ̀lú idà lára rẹ ní gbogbo ẹ̀gbẹ́ nígbà náà wọn yóò mọ̀ wí pé èmi ni OLÚWA.

²⁴“ ‘Kì yóò sì sí ẹ̀gún tí ń gun ni ní ilẹ̀ Ísírẹ́lì mọ́, tàbí ẹ̀gún bíbani nínú jẹ́ ti gbogbo àwọn tí wọn wà ní àyíká wọn, tí wọ́n sì ń fi ojú yẹpẹrẹ wò wọ́n, nígbà náà ni wọn yóò mọ́ wí pé èmi ni OLÚWA Ọlọ́run.

²⁵“ ‘Èyí yìí ní OLÚWA Ọlọ́run wí: Nígbà tí èmi yóò bá ṣa àwọn ènìyàn Ísírẹ́lì jọ kúrò ní gbogbo orílẹ̀ èdè tí wọ́n ti fọ́nká sí, tí a ó sì yà mí sí mímọ́ láàárin wọn lójú àwọn aláìkọlà; Nígbà náà ni wọn yóò gbé ní ilẹ̀ àwọn tìkalára wọn, èyí tí mo fún ìránṣẹ́ mi Jákọ́bù.

²⁶Wọn yóò sì máa gbé ní inú rẹ̀ ní àìléwu, wọn yóò sì kọ́lé, wọn yóò sì gbin ọgbà àjàrà; nítòótọ́ wọn yóò wà ní ìbàlẹ̀ àyà, nígba tí èmi bá ti mú ìdájọ́ mi sẹ sí ara àwọn tí ń ṣáátá wọn ní gbogbo àyíká wọn; Nígbà náà ni wọn yóò mọ̀ pé Èmi ni OLÚWA Ọlọ́run wọn.’ ”