Ìwé Wòlíì Hósíà 11:1-12 BYB2014 - Bible AI

¹ⓐ “Nígbà tí Ísírẹ́lì wà ní ọmọdé mo fẹ́ràn rẹ̀, mo sì pe ọmọ mi jáde wá láti Éjíbítì.

²Wọ́n rúbọ sí Báálì bí mo ṣe ń pe Ísírẹ́lì sí bẹ́ẹ̀ ni wọ́n ṣe ń sá kúrò lọ́dọ̀ mi jìnnà sí i: wọn rúbọ sí báálímu, wọn sì fi tùràrí jóná sí ère fínfín.

³Lóòtọ́ mo kọ́ Éfúráímù pẹ̀lú ní ìrìn mo di wọ́n mú ní apá, ṣùgbọ́n wọn kò mọ̀ pé mo ti mú wọn lára dá.

⁴Mo fó okùn ènìyàn fà wọ́n àti ìdè ìfẹ́. Mo mú àjàgà kúrò ni ọrùn wọn Mo sì farabalẹ̀ fún wọn ni oúnjẹ.

⁴

⁵“Ṣé wọn ò wá ní padà sí Éjíbítì bí Ṣé Ásíríà kò sì ní jẹ ọba lé wọn lórí bí nítorí pé wọ́n kọ̀ jálẹ̀ láti ronú pìwàdà?

⁶Idà yóò kọ mọ̀nà ní gbogbo ìlú wọn yóò si bá gbogbo irin ẹnú odi ìlú wọn jẹ́ yóò sì fòpin sí gbogbo èrò wọn.

⁷Àwọn ènìyàn mi ti pinnu láti pẹ̀yìndà kúrò lọ́dọ̀ mi Bí wọ́n tilẹ̀ pè wọ́n sọ́dọ̀ ọ̀gá-ògo júlọ, kò ní gbé wọn ga rárá.

⁷

⁸“Báwo ni èmi ó ṣe fi ọ́ sílẹ̀, Éfúráímù? Báwo ni èmi ó ṣe yọ̀ǹda rẹ̀, Ísírẹ́lì Báwo ni mo ṣe lè ṣe ọ bi i Ádímà? Báwo ni mo ṣe lè ṣe ọ bi i Ṣébóímù? Ọkàn mi yípadà nínú mi Àánú mi sì ru sókè

⁹Èmi kò ni i mú ìbínú gbígbóná mi ṣẹ tàbí kí èmi wá sọ Éfúráímù di ahoro Nítorí pé Ọlọ́run ni àni, èmi kì í ṣe ènìyàn Ẹni mímọ́ láàrin yín, Èmi kò ni i wa nínú ìbínú

¹⁰Wọn yóò máa tẹ̀lé OLÚWA; òun yóò bú ramúramù bí i kìnnìún Nígbà tó bá bú àwọn ọmọ yóò wá ní ìwárìrì láti ìwọ̀ oòrùn.

¹¹Wọn ó wá pẹ̀lú ẹ̀rù bi i ẹyẹ láti Éjíbítì bi i àdàbà láti Ásíríà Èmi ó mú wọn padà sí ilé wọn,” ni OLÚWA wí.

¹²Éfúráímù tí fi irọ́ yí mi ká ilé Ísírẹ́lì pẹ̀lú ẹ̀tàn. Ṣùgbọ́n Júdà sì dúró ṣinṣin pẹ̀lú Ọlọ́run Ó sì ṣe olóòótọ́ sí Ẹni mímọ́ Ísírẹ́lì.