Ìwé Wòlíì Hósíà 5:1-15 BYB2014 - Bible AI

¹“Ẹ gbọ́ èyí, ẹ̀yìn àlùfáà! Ẹ fetí sílẹ̀ ẹ̀yin ọmọ Ísírẹ́lì! Ẹ gbọ́, ẹ̀yìn ilé ọba! Ìdájọ́ yìí kàn yín: Ẹ ti jẹ́ ẹ̀bìtì ní Mísípà Àwọ̀n ti a nà sìlẹ̀ lórí Tábórì

²Àwọn ọlọ̀tẹ̀ ti gbilẹ̀ nínú ìpànìyàn Gbogbo wọn ni èmi ó bá wí,

³Mo mọ ohun gbogbo nípa Éfúráímù Ísírẹ́lì kò sì pamọ́ fún mi Éfúráímù, ní báyìí ó ti di alágbèrè Ísírẹ́lì sì ti díbàjẹ́

³

⁴“Iṣe wọn kò gbà wọ́n láàyè láti padà sí ọ̀dọ̀ Ọlọ́run wọn. Ẹ̀mí àgbèrè wà láàrin wọn kò sì mọ OLÚWA.

⁵Ìgbéraga Ísírẹ́lì ń jẹ́rìí lé wọn; Àwọn ọmọ Ísírẹ́lì, àti Éfúráímù pàápàá kọsẹ̀ nínú ẹ̀ṣẹ̀ wọn. Júdà náà sì kọṣẹ̀ pẹ̀lú wọn.

⁶Nígbà tí wọ́n bá lọ pẹ̀lú agbo ẹran àti ọ̀wọ́ ẹran wọn láti wá OLÚWA, wọn kò ní rí i, ó ti yọ ara rẹ̀ kúrò láàrin wọn.

⁷Wọ́n jẹ́ aláìsòótọ́ sí OLÚWA wọ́n sì bí àwọn ọmọ àlè. Nísinsìn yìí, ọdún oṣù tuntun wọn, ni yóò pa wọn run pẹ̀lú pín wọn.

⁷

⁸“Fọn fère ní Gíbíà, kí ẹ sì fun ipè ní Rámà. Ẹ pariwó ogun ní Bẹti-Áfélì máa wárìrì, ìwọ Bẹ́ńjámínì.

⁹Éfúráímù yóò di ahoro ní ọjọ́ ìbáwí láàrin àwọn ẹ̀yà Ísírẹ́lì Mo sọ ohun tí ó dájú.

¹⁰Àwọn olórí Júdà dàbí àwọn tí í máa yí òkúta ààlà kúrò. Èmi ó tú ìbínú gbígbóná mi lé wọn lórí bí ìkún omi.

¹¹A ni Éfúráímù lára, A sì tẹ̀ ẹ́ mọ́lẹ̀ ní ìdájọ́ nítorí pé, ó pinnu láti tẹ̀lé òrìṣà

¹²Mo dàbí kòkòrò aṣọ sí Éfúráímù Mo sì dàbí ìdin sí ara Júdà.

¹²

¹³“Nígbà ti Éfúráímù ri àìsàn rẹ̀, tí Júdà sì rí ojú egbò rẹ̀ ni Éfúráímù bá tọ ará Síríà lọ, ó sì ránṣẹ́ sí ọba ńlá náà fún ìrànlọ́wọ́ ṣùgbọ́n kò le è wò ó sàn bẹ́ẹ̀ ni kò le wo ojú egbò rẹ̀ jinná

¹⁴Nítorí pé, èmi ó dàbí kìnnìún sí Éfúráímù, bí i kìnnìún ńlá sí ilé Júdà. Èmi ó fà wọ́n ya pẹ́rẹpẹ̀rẹ èmi ó sì lọ; Èmi ó gbé wọn lọ, láì sí ẹni tí yóò gbà wọ́n sílẹ̀.

¹⁵Nígbà náà ni èmi ó padà lọ sí ààyè mi títí di ìgbà tí wọn ó fi gbà pé àwọn jẹ̀bi wọn yóò sì wá ojú mi nínú ìpọ́njú wọn, wọn ó fi ìtara wá mi.”