Ìwé Wòlíì Jónà 2:1-10 BYB2014 - Bible AI

¹Ngbà náà ni Jónà gbàdúrà sí OLÚWA Ọlọ́run rẹ̀ láti inú ẹja náà wá,

²Ó sì wí pé:

²“Nínú ìpọ́njú mi ni mo kígbe sí OLÚWA, òun sì gbọ́ ohùn mi. Mo kígbe láti inú ipò òkú, mo pè fún iraǹwọ́, ìwọ sì gbọ́ ohùn mi.

³Nítorí tí ìwọ ti sọ mí sínú ibú, ní àárin òkun, ìṣàn omi sì yí mi káàkiri; gbogbo bíbì omi àti rírú omi ré kọjá lórí mi.

⁴Nígbà náà ni mo wí pé, ‘a ta mí nù kúrò níwájú rẹ; ṣùgbọ́n ṣíbẹ̀ èmi yóò tún máa wo ìhà tẹ́ḿpìlì mímọ́ rẹ.’

⁵Omi yí mi káàkiri, àní títí dé ọkàn; ibú yí mi káàkiri, a fi koríko odò wé mi lórí.

⁶Èmi ṣọ̀kalẹ̀ lọ sí ìṣàlẹ̀ àwọn òkè ńlá; ilẹ̀ ayé pẹ̀lú ìdènà rẹ̀ yí mi ká títí: ṣùgbọ́n ìwọ ti mú ẹ̀mí mi wá sókè láti inú ibú wá, OLÚWA Ọlọ́run mi.

⁶

⁷“Nígbà tí ó rẹ ọkàn mi nínú mi, èmi rántí rẹ, OLÚWA, àdúrà mi sì wá sí ọ̀dọ̀ rẹ, nínú tẹ́ḿpìlì mímọ́ rẹ.

⁷

⁸“Àwọn tí ń fàmọ́ òrìṣà èké kọ àánú ara wọn sílẹ̀.

⁹Ṣùgbọ́n èmi yóò fi orin ọpẹ́, rúbọ sí ọ. Èmi yóò san ẹ̀jẹ́ tí mo ti jẹ́. ‘Igbàlà wá láti ọdọ OLÚWA.’ ”

¹⁰OLÚWA sì pàṣẹ fún ẹja náà, ó sì pọ Jónà sí orí ilẹ̀ gbígbẹ.