Ìwé Wòlíì Jeremáyà 48:1-47 BYB2014 - Bible AI

¹ⓐ Nípa Móábù: Báyìí ni OLÚWA àwọn ọmọ-ogun Ọlọ́run Ísírẹ́lì wí: “Ègbé ni fún Nébò nítorí a ó parun. A dójú ti Kíríátaímù, a sì mú un, ojú yóò ti alágbára, a ó sì fọ́nká.

²Móábù kò ní ní ìyìn mọ́, ní Héṣíbónì ni wọn ó pète ìparun rẹ̀, ‘Wá, kí a pa orílẹ̀ èdè náà run.’ Àti ẹ̀yin òmùgọ̀ ọkùnrin pàápàá ni a ó pa lẹ́nu mọ́, a ó fi idà lé e yín.

³Gbọ́ igbe ní Horonáímù, igbe ìrora àti ìparun ńlá.

⁴Móábù yóò di wíwó palẹ̀; àwọn ọmọdé rẹ̀ yóò kígbe síta.

⁵Wọ́n gòkè lọ sí Lúhítì, wọ́n ń sunkún kíkorò bí wọ́n ti ń lọ; ní ojú ọ̀nà sí Horonáímù igbe ìrora ìparun ni à ń gbọ́ lọ.

⁶Sá! Àsálà fún ẹ̀mí rẹ; kí o dàbí igbó ní aṣálẹ̀.

⁷Níwọ̀n ìgbà tí o gbẹ́kẹ̀lé agbára àti ọrọ̀ rẹ, a ó kó ìwọ náà ní ìgbèkùn, Sémọ́sì náà yóò lọ sí ilẹ̀ ìgbèkùn pẹ̀lú àlùfáà àti àwọn aláṣẹ rẹ̀.

⁸Gbogbo ìlú rẹ ni apanirun yóò dojúkọ, ìlú kan kò sì ní le là. Àfonífojì yóò di ahoro àti ilẹ̀ títẹ́ ni a ó run, nítorí tí OLÚWA ti sọ̀rọ̀.

⁹Fi iyọ̀ sí Móábù, nítorí yóò ṣègbé, àwọn ìlú rẹ yóò sì di ahoro láìsí ẹni tí yóò gbé inú rẹ̀.

⁹

¹⁰“Ìfibú ni fún ẹni tí ó dúró láti ṣe iṣẹ́ OLÚWA, ìfibú ni fún ẹni tí ó pa idà mọ́ fún ìtàjẹ̀sílẹ̀.

¹⁰

¹¹“Móábù ti wà ní ìsinmi láti ìgbà èwe rẹ̀ wá bí i ọtí wáìnì lórí gẹ̀dẹ̀gẹ́dẹ̀ rẹ̀, tí a kò dà láti ìgò kan sí èkejì kò tí ì lọ sí ilẹ̀ ìgbèkùn rí. Ó dùn lẹ́nu bí ó ti yẹ, òórùn rẹ̀ kò yí padà.

¹²Ṣùgbọ́n ọjọ́ ń bọ̀,” ni OLÚWA wí, “nígbà tí n ó rán àwọn tí ó da ọtí láti inú àwọn ìgò tí wọ́n ó sì dà á síta; Wọn ó sọ àwọn ìgò rẹ̀ di òfo, wọn ó sì fọ́ àwọn ife rẹ̀.

¹³Nígbà náà Móábù yóò sì tú u nítorí kémósì, bí ojú ti í ti ilé Ísírẹ́lì nígbà tí ó gbẹ́kẹ̀lé Bétélì.

¹³

¹⁴“Báwo ni o ṣe lè sọ pé, ‘ajagun ni wá, alágbára ní ogun jíjà’?

¹⁵A ó pa Móábù run, a ó sì gba àwọn ìlú rẹ̀; a ó sì dúńbú àwọn arẹwà ọkùnrin rẹ̀,” ni Ọba wí, ẹni tí orúkọ rẹ̀ ń jẹ́ OLÚWA àwọn ọmọ-ogun.

¹⁶“Ìṣubú Móábù súnmọ́; ìpọ́njú yóò dé kánkán.

¹⁷Ẹ dárò fún, gbógbó ẹ̀yin tí ó yí i ká gbogbo ẹ̀yin tí ẹ mọ bí ó ti ní òkìkí tó. Ẹ sọ pé, ‘Báwo ni ọ̀pá agbára rẹ títóbi tí ó sì lógo ṣe fọ́!’

¹⁷

¹⁸“Sọ̀kalẹ̀ níbi ògo rẹ, kí o sì jókòó ní ilẹ̀ gbígbẹ, ẹ̀yin olùgbé ọmọbìnrin Díbónì, nítorí tí ẹni tí ó pa Móábù run yóò dojúkọ ọ́ yóò sì pa àwọn ìlú olódi rẹ run.

¹⁹Dúró lẹ́bàá ọ̀nà kí o sì wòran, ìwọ tí ń gbé ní Áróà. Bí ọkùnrin tí ó sálọ àti obìnrin tí ó ń sá àsálà ‘kí ni ohun tí ó ṣẹlẹ̀?’

²⁰Ojú ti Móábù nítorí tí a wó o lulẹ̀, ẹ hu, sì kígbe síta! Ámónì kéde pé a pa Móábù run.

²¹Ìdájọ́ ti dé sí Pílátéù sórí Hólónì, Jáhásà àti Mẹ́fátì,

²²sórí Díbónì, Nébò àti Bẹti Díbílátaímù

²³sórí Kíríátaímù, Bẹti Gámù àti Bẹti Méónì,

²⁴sórí Kéríótì àti Bóásì, sórí gbogbo ìlú Móábù, nítòsí àti ní ọ̀nà jínjìn.

²⁵A gé ìwo Móábù kúrò, apá rẹ̀ dá,” ni OLÚWA wí.

²⁵

²⁶“Ẹ jẹ́ kí a mú u mutí nítorí ó kó ìdọ̀tí bá OLÚWA, jẹ́ kí Móábù pàfọ̀ nínú èébì rẹ̀, kí ó di ẹni ẹ̀gàn.

²⁷Ǹjẹ́ Ísírẹ́lì kò di ẹni ẹ̀gan rẹ? Ǹjẹ́ a kó o pẹ̀lú àwọn olè tó bẹ́ẹ̀ tí o ń gbọn orí rẹ̀ pẹ̀lú yẹ̀yẹ́ nígbákùúgbà bí a bá sọ̀rọ̀ nípa rẹ̀?

²⁸Kúrò ní àwọn ìlú rẹ, kí o sì máa gbé láàrin àwọn òkúta, ẹ̀yin tí ó ti ń gbé inú ìlú Móábù. Ẹ dàbí i àdàbà tí ó kọ́ ìtẹ́ rẹ̀ sí ẹnu ihò.

²⁸

²⁹“A ti gbọ́ nípa ìgbéraga Móábù: àti ìwà mo gbọ́n tan rẹ̀ àti ìgbéraga ọkàn rẹ̀.

³⁰Mo mọ àfojúdi rẹ̀, ṣùgbọ́n òfo ni,” ni OLÚWA wí, “ìfọ́nnu rẹ̀ kò lè ṣe nǹkankan.

³¹Nítorí náà, mo pohùnréré ẹkún lórí Móábù fún àwọn ará Móábù ni mo kígbe lóhùn rara Mo kẹ́dùn fún àwọn ọkùnrin Kíháráṣè.

³²Mo sunkún fún ọ bí Jásì ṣe sunkún ìwọ àjàrà Síbínà. Ẹ̀ka rẹ tẹ̀ títí dé òkun wọn, Ámónì, ajẹnirun ti kọlu èṣo rẹ àti àwọn èṣo àjàrà rẹ.

³³Ayọ̀ àti ìdùnnú ti kúrò nínú ọgbà àjàrà àti oko Móábù, mo dá ọwọ́ ṣíṣàn ọtí wáìnì dúró lọ́dọ̀ olùfúnni; kò sí ẹni tí ó ń tẹ̀ wọ́n pẹ̀lú igbe ayọ̀ Bí ó tilẹ̀ jẹ́ pé wọn kì í ṣe ti ayọ̀.

³³

³⁴“Ohùn igbe wọn gòkè láti Hésíbónì dé Élíà àti Jásì láti Sóà títí dé Hórónáímù àti Éjíbítì Sélíáyà, nítorí àwọn omi Nímírímù pẹ̀lú ti gbẹ

³⁵Ní ti Móábù ni èmi yóò ti fi òpin sí ẹni tí ó rúbọ sí ibí gíga àti ẹni tí ń sun tùràrí fún òrìṣà rẹ̀,” ni OLÚWA wí.

³⁶“Nítorí náà ọkàn mi ró fún Móábù bí fèrè oró Híhárésétì ìṣúra ńlá tí wọ́n kójọ ṣègbé.

³⁷Gbogbo orí mi ni ó pá, gbogbo irungbọ̀n ni a gé kúrò, gbogbo ọwọ́ ni a ṣá lọ́gbẹ́, àti aṣọ ọ̀fọ̀ ní gbogbo ẹ̀gbẹ́.

³⁸Ní gbogbo orílẹ̀ èdè Móábù àti ní ita kò sí ohun kan bí kò ṣe ọ̀fọ̀, nítorí tí mo fọ́ Móábù bí a ti ń fọ́ ohun elò tí kò wu ni,” ni OLÚWA wí.

³⁹“Èéṣe tí ẹ fi fọ́ túútúú, tí ẹ sì fi ń pohùnréré ẹkún! Báwo ni Móábù ṣe yí ẹ̀yìn padà ní ìtìjú! Móábù ti di ẹni ìtìjú àti ẹ̀gàn àti ìdààmú sí gbogbo àwọn tí ó yìí ká.”

⁴⁰Báyìí ni OLÚWA wí: “Wò ó ẹyẹ idì náà ń fò bọ̀ nílẹ̀ ó sì na ìyẹ́ rẹ̀ lórí Móábù.

⁴¹Koríko kan yóò di kíkó àti àwọn ìlú olódì. Ní ọjọ́ náà ọkàn akọni Móábù yóò dàbí ọkàn obìnrin tí ó ń rọbí.

⁴²A ó pa Móábù run gẹ́gẹ́ bí orílẹ̀ èdè nítorípé ó gbéraga sí OLÚWA.

⁴³Ẹ̀rù àti ọ̀fìn àti okùn dídè ń dúró dè yín, ẹ̀yin ènìyàn Móábù,” ní OLÚWA wí.

⁴⁴“Ẹnikẹ́ni tí ó bá sá fún ẹ̀rù yóò ṣubú sínú ọ̀fìn ẹnikẹ́ni tí o bá jáde síta nínú ọ̀fìn ní à ó mú nínú okùn dídè nítorí tí èmi yóò mú wá sórí Móábù àní ọdún Ìjìyà rẹ,” ní OLÚWA wí.

⁴⁴

⁴⁵“Ní abẹ́ òjìji Hésíbónì àwọn tí ó sá dúró láìní olùrànlọ́wọ́ nítorí iná ti jáde wá láti Hésíbónì àti ọwọ́ iná láti àárin Síónì sì jó iwájú orí Móábù run àti agbárí àwọn ọmọ àlùfáà.

⁴⁶Ègbé ní fún ọ Móábù! Wọn yóò sì kó àwọn ọmọkùnrin yín lọ sí ilẹ̀ àjèjì àti àwọn ọmọbìnrin yín lọ sí ìgbékùn.

⁴⁶

⁴⁷“Síbẹ̀, èmi yóò dá ìkólọ Móábù padà ní ọjọ́ ìkẹyìn,” ni OLÚWA wí.