Ìwé Wòlíì Náhúmù 1:1-15 BYB2014 - Bible AI

¹Ọ̀rọ̀ ìmọ̀ nípa Nínéfè. Ìwé ìran Náhúmù ará Elikósì.

²OLÚWA ń jowu, ó sì ń gbẹ̀san. OLÚWA ń gbẹ̀san, ó sì kún fún ìbínú OLÚWA ń gbẹ̀san lára àwọn ọ̀tá rẹ̀, Ìbínú rẹ̀ kò sì yí padà lórí àwọn ọ̀tá rẹ̀

³ⓐ  OLÚWA lọ́ra láti bínú, ó sì tóbi ní agbára; OLÚWA kì yóò fi àwọn ẹlẹ́ṣẹ̀ sílẹ̀ láì jìyà. Ọ̀nà rẹ̀ wà nínú ààjà àti nínú ìjì, Ìkùùku sánmọ̀ sì ni eruku ẹsẹ̀ rẹ̀.

⁴Ó bá òkun wí, ó sì mú kí ó gbẹ; Ó sí sọ gbogbo odò di gbígbẹ. Báṣánì àti Kámẹ́lì sì rọ, Ìtànná Lébánónì sì rẹ̀ sílẹ̀.

⁵Àwọn òkè ńlá wárìrì níwájú rẹ̀, àwọn òkè kéékèèkéé sì di yíyọ́, ilẹ̀ ayé sì jóná níwájú rẹ̀, àní ayé àti gbogbo àwọn tí ń gbé inú rẹ̀.

⁶Ta ni ó lé dúró níwájú ìbínú rẹ̀? Ta ni ó lé faradà gbígbóná ìbínú rẹ̀? Ìbínú rẹ̀ tú jáde bí iná; àwọn àpáta sì fọ́ túútúú níwájú rẹ̀.

⁷Rere ni OLÚWA, ààbò ní ọjọ ìpọ́njú. Òun sì tọ́jú àwọn tí ó gbẹ́kẹ̀ lé e,

⁸Ṣùgbọn pẹ̀lú ìkún omi ńlá ní òun yóò fi ṣe ìparun ibẹ̀ dé òpin; òkùnkùn yóò sì máa lépa àwọn ọ̀tá rẹ̀.

⁸

⁹Kí ni ẹ̀yìn ń gbìmọ lòdì sí OLÚWA? Òun yóò fi òpin sí i, Ìpọ́njú kì yóò wáyé ní ìgbà kejì

¹⁰Wọn yóò sì lọ́lù papọ̀ bí ẹ̀gún òṣùṣù wọn yóò sì mu àmupara nínú ọtí wáìnì wọn a ó sì run wọn gẹ́gẹ́ bi àkékù koríko gbígbẹ

¹¹Láti ọ̀dọ̀ rẹ, ìwọ Nínéfè, ni ẹnìkan ti jáde wá tí ó ń gbérò ibi sí OLÚWA ti ó sì ń gbìmọ̀ búburú.

¹²Báyìí ni OLÚWA wí: “Bí wọ́n tilẹ̀ pé, tí wọ́n sì pọ̀ níye, Ṣùgbọ́n, báyìí ní a ó ké wọn lulẹ̀, nígbà tí òun ó bá kọ́já. Bí mo tilẹ̀ ti pọ́n ọ lójú ìwọ Júdà, èmi kì yóò pọ́n ọ lójú mọ́.

¹³Nísinsin yìí ni èmi yóò já àjàgà wọn kúrò ní ọrùn rẹ èmi yóò já sẹkẹ́sẹkẹ̀ rẹ dànù.”

¹³

¹⁴OLÚWA ti fi àṣẹ kan lélẹ̀ nítorí tìrẹ Nínéfè: “Ìwọ kì yóò ni irú ọmọ láti máa jẹ́ orúkọ rẹ mọ́, Èmi yóò pa ère fínfín àti ère dídà run tí ó wà nínú tẹ́ḿpílì àwọn ọlọ́run rẹ. Èmi yóò wa ibojì rẹ, nítorí ẹ̀gbin ni ìwọ.”

¹⁴

¹⁵ⓑ Wò ó, lórí àwọn okè, awọn ẹsẹ̀ ẹni tí ó mú ìròyin ayọ wá, ẹni tí ó ń kéde àlàáfíà, Ìwọ Júdà, pa àṣẹ rẹ tí ó ní ìrònú mọ́, kí ó sì san àwọn ẹ̀jẹ́ rẹ. Àwọn ènìyàn búburú kì yóò sì gbógun tì ọ́ mọ́; Wọn yóò sì parun pátapáta.